ДАМОВА АБ СУПРАЦОЎНІЦТВЕ ЕЎРАПАРЛАМЕНТА І ДЭМАКРАТЫЧНЫХ СІЛАЎ
На гэтым тыдні падчас працоўнага візіту на Мальту Святлана Ціханоўская сустрэлася з прэзідэнткай Еўрапейскага парламента Рабертай Метсолай. Вынікам сустрэчы стала падпісанне дамовы аб супрацоўніцтве паміж Еўрапарламентам і беларускімі дэмакратычнымі сіламі. Еўрапейскі Парламент упершыню падпісаў дакумент такога кшталту не з афіцыйным урадам.
ФОНД ПАДТРЫМКІ ПАЛІТВЯЗНЯЎ
Па ініцыятыве Святланы Ціханоўскай у Нарвегіі стварылі Міжнародны гуманітарны фонд дапамогі беларускім палітзняволеным і іх сем’ям. Падтрымка будзе ўключаць медычную, матэрыяльную і псіхалагічную дапамогу, а таксама рэабілітацыю для асобаў, якія зазналі палітычныя рэпрэсіі ад рэжыму.
Таксама беларуская лідарка пракаментавала сітуацыю з палітвязнямі, якіх утрымліваюць у рэжыме інкамунікада: «Для таго, каб гаварыць пра палітвязняў, не патрэбныя нагоды. Ужо 443 дні мы не маем вестак ад Марыі Калеснікавай. 449 дзён – ад Максіма Знака. 448 – ад Мікалая Статкевіча. Ад Віктара Бабарыкі – 452 дні. 438 дзён – ад Ігара Лосіка. 421 дзён я нічога не ведаю пра лёс майго мужа Сяргея. У сітуацыі, калі іх катуюць і не аказваюць аніякай дапамогі, гэта не толькі палітычнае, але і гуманітарнае пытанне!»
ВІЗІТ У НАРВЕГІЮ
Падчас працоўнага візіту ў Нарвегію Святлана Ціханоўская сустрэлася са спікерам Парламента Масудам Гарахані, міністрам замежных справаў Эспэнам Бартам Эйде, мэрам Осла Аннэ Ліндбу і міністаркай культуры Нарвегіі Любнай Яфэры.
Акрамя таго, беларуская лідарка выступіла з прамовай перад Пастаянным камітэтам па замежных справах і абароне Нарвегіі, правяла брыфінг для экспертнай супольнасці ў Нарвежскім інстытуце па замежных справах, выступіла на канферэнцыі Words Matter. Таксама дала інтэрв’ю шэрагу нарвежскіх і міжнародных СМІ, у тым ліку BBC.
ВІЗІТ НА МАЛЬТУ
Падчас працоўнага візіту на Мальту беларуская лідарка падпісала дамову аб супрацоўніцтве з прэзідэнткай Еўрапейскага Парламента Рабертай Метсолай, а таксама сустрэлася з шэрагам ключавых палітыкаў дзяржавы: прэзідэнткай Мальты, міністрам замежных справаў і спікерам Парламента. Мальта стала 26-й краінай ЕС, якую наведала Святлана Ціханоўская. Апошняя краіна Еўрасаюза, якая пакуль не прыняла Ціханоўскую – Венгрыя.
ДЗЕНЬ СВАБОДЫ ПРЭСЫ
3 траўня, у Сусветны дзень свабоды прэсы, Святлана Ціханоўская адзначыла: «Рэжым старанна знішчае «чацвёртую ўладу» – бо першыя тры ён ужо падпарадкаваў сабе. У барацьбе за свабоду слова і дэмакратычныя каштоўнасці, журналістыка – адзін з найважнейшых інстытутаў. І мы павінныя яго зберагчы».
ДЗЕНЬ ПРАЦЫ
Па ўсім свеце Дзень працы сімвалізуе барацьбу за правы працоўных і адстойванне сацыяльнай справядлівасці. Святлана Ціханоўская: «У Беларусі мы сутыкаемся з трагічнай іроніяй: абвясціўшы 1 траўня святочным днём, улада актыўна душыць незалежныя прафсаюзы і абмяжоўвае правы рабочых. Два гады таму ўлады ліквідавалі Беларускі Кангрэс дэмакратычных прафсаюзаў і яго сяброўскія арганізацыі. Лепшы спосаб адсвяткаваць сёння 1 траўня – гэта працягнуць іх традыцыю барацьбы за правы працоўных. Не дазваляйце ўшчамляць вашыя правы нават у дробязях».
СВАБОДА РЭЛІГІІ І ПЕРАКАНАННЯЎ БЕЛАРУСАЎ
29 красавіка, падчас працоўная паездкі ў Нарвегію, Святлана Ціханоўская наведала Нарвежскі Хельсінкскі камітэт. У гэта ж дзень. Міжнародная панэль парламентарыяў за свабоду рэлігіі і перакананняў, якая дзейнічае на базе Камітэта, запусціла працэс падпісання ліста ў абарону свабоды рэлігіі і перакананняў беларусаў.
ПАРАДЫ ПА ЛІЧБАВАЙ БЯСПЕЦЫ
У апошні час назіраецца падвышаная актыўнасць фішынгавых махляроў, якія дасылаюць лісты з падробленых адрасоў, падобных на кантакты Офіса Святланы Ціханоўскай. Каманда Офіса падрыхтавала карткі, у якіх расказваецца, што такое фішынг, як яго распазнаць і абараніцца.
МЕДЫЯ
Святлана Ціханоўская дала інтэрв’ю BBC (Міжнароднае), NRK (Нарвегія), Global News (Канада), Kathimerini Newspaper (Грэцыя).
