Арганізацыя FreeBelarus, беларуская жаночая арганізацыя «Māra» і Офіс Святланы Ціханоўскай возьмуць удзел у летнім фестывалі дыскусіяў LAMPA у Цэсісе (Латвія). 5 і 6 ліпеня ў «Намёце кепскіх суседзяў» пройдуць дыскусіі, гульні, ранішнія практыкаванні і іншыя актыўнасці, прысвечаныя тэме дэмакратычнай Беларусі.
Каб забяспечыць разнастайнасць і задаволіць інтарэсы беларускай дыяспары, дзве падзеі будуць абраныя праз адкрыты конкурс – і менавіта да ўдзелу ў ім запрашаюцца няўрадавыя арганізацыі і ініцыятывы з Латвіі, Літвы і Эстоніі. Мы заклікаем далучыцца да конкурсу як беларускія дыяспары, так і іншыя арганізацыі з краінаў Балтыі.
Штогадовы фестываль дыскусіяў LAMPA праходзіць у маляўнічым горадзе Цэсіс, які знаходзіцца непадалёку ад сталіцы Латвіі Рыгі.
У рамках фестывалю пройдзе больш за 300 мерапрыемстваў на розныя тэмы: дыскусіі, майстар-класы, конкурсы, спектаклі, гульні і перформансы. За дыскусіямі таксама можна сачыць анлайн на сайце фестывалю.
Галоўная місія фестывалю LAMPA – умацаванне культуры дэмакратыі, дэбатаў і паважлівых размоваў у Латвіі. Штогод яго наведвае больш за 20 тысяч чалавек – івэнт становіцца месцам сустрэчы няўрадавых арганізацыяў, органаў дзяржаўнага кіравання і мясцовых уладаў.
Хто можа падаць заяўку: любая няўрадавая арганізацыя ці ініцыятыва з Латвіі, Літвы і Эстоніі, што хоча арганізаваць мерапрыемства ў рамках беларускай праграмы. Асноўныя прынцыпы ўдзелу ў LAMPA:
- Так – ветлівай размове. Не – мове варожасці.
- Кожны арганізатар бярэ адказнасць за сваё мерапрыемства: змест і сцэнарый, спікераў і іншых удзельнікаў, камунікацыю ў сацыяльных сетках.
- Вітаецца дыскусія і прыцягненне аўдыторыі з дапамогай розных фарматаў.
- Разнастайнасць цэніцца. Гэта не маналог пра людзей, якія адрозніваюцца ад нас. Мы запрашаем іх, каб размаўляць разам.
- Тут няма месца рэкламе. Мы не рэкламуем тавары і паслугі.
- Мы падкрэсліваем важнасць дэмакратыі і культуры дыскусіі.
Як падаць заяўку: запоўніце анлайн-форму.
Дэдлайн падачы: 10 красавіка 2024, 23:59 (па Мінску).
Што будзе далей: незалежныя эксперты і эксперткі будуць ацэньваць заяўкі. Мы паведамім пра вынікі па электроннай пошце да 29 красавіка.
Для вашага ўдзелу ў LAMPA мы прапануем: сцэнічнае і гукавое абсталяванне, перакладчыка на латышскую мову (пры неабходнасці), ментара, піяршчыка, валанцёраў на месцы мерапрыемства.
Вы забяспечваеце самастойна: напаўненне мерапрыемства і яго правядзенне, лагістыку ўдзельніц і ўдзельнікаў і іх знаходжанне ў Цэсісе. Вы можаце падаць заяўку ў іншыя арганізацыі і фонды на дадатковыя сродкі для мерапрыемства, пакрыцця выдаткаў на транспарт і пражыванне ў Латвіі. Мы не забяспечваем фінансавую падтрымку.
Перш чым запоўніць форму, даведайцеся больш пра сам фестываль LAMPA.
Інструкцыі для арганізатараў мерапрыемстваў LAMPA
Больш інфармацыі пра фестывалі дэмакратыі ў рэгіёне
Па дадатковых пытаннях можна звяртацца на [email protected].
