Міжпарламенцкі Альянс парламенцкіх групаў «За дэмакратычную Беларусь» — міжнародная сетка салідарнасці, якая аб’ядноўвае больш як 300 дэпутатаў і дэпутатак з нацыянальных парламентаў і міжнародных парламенцкіх структураў. Гэта парасонавая платформа, што аб’ядноўвае групы падтрымкі Беларусі і беларусаў (-ак) у парламентах розных краінаў і на міжнародных пляцоўках накшталт Еўрапейскага парламента.
Працэс фармавання Альянсу пачаўся 1 сакавіка 2023 года ў Еўрапейскім парламенце, а ўжо 7 лістапада ў Берліне ён быў афіцыйна зацверджаны як каардынацыйная платформа.
У Альянсе ўжо прадстаўленыя парламенцкія групы з больш як 20 краінаў і некалькіх міжнародных структураў.
Мэты і прыярытэты
Асноўная мэта Альянсу — падтрымка беларусаў і беларусак у іх барацьбе за свабоду, правы чалавека і дэмакратычныя перамены. Сярод ключавых задачаў:
- захаванне беларускага пытання ў міжнародным парадку дня;
- інтэграцыя беларусаў і беларусак у выгнанні ў мясцовае грамадства;
- падтрымка грамадзянскай супольнасці, незалежных медыя і праваабаронцаў;
- узмацненне міжнароднага ціску на рэжым;
- развіццё прававых рамак для будучай дэмакратычнай Беларусі;
- падтрымка рэпрэсаваных і іх сем’яў.
Метады і фарматы працы
Альянс працуе праз шырокі спектр інструментаў, сярод якіх:
- сустрэчы ў парламентах і міжнародных інстытуцыях;
- акцыі салідарнасці і публічныя заявы;
- прыняцце рэзалюцыяў і правядзенне слуханняў;
- заканадаўчыя ініцыятывы і юрыдычная экспертыза;
- стажыроўкі для маладых беларусаў(-ак) у парламентах краінаў-партнёраў;
- патранаж над палітзняволенымі і рэгулярнае ўзняцце гэтай тэмы на афіцыйных пляцоўках.
Альянс праводзіць рэгулярныя сумесныя пасяджэнні. Апошняе прайшло ў Парыжы ў кастрычніку 2025 года, а наступнае запланаванае ў Лондане ў 2026 годзе.
Беларусы і беларускі могуць непасрэдна звяртацца да прадстаўнікоў групаў з прапановамі ці канкрэтнымі праблемамі.
Вынікі працы
За час існавання Альянс дасягнуў істотных вынікаў, у тым ліку:
- падрыхтоўка і прыняцце «Люксембургскіх рашэнняў» — пакета рэкамендацыяў для нацыянальных парламентаў Еўропы па дапамозе беларусам і беларускам у выгнанні;
- падпісанне пагаднення аб супрацоўніцтве з Еўрапарламентам;
- прыняцце больш як дваццаці міжнародных рэзалюцыяў аб Беларусі за год;
- пашырэнне заканадаўчай падтрымкі беларусаў у розных краінах;
- запуск праграмаў стажыровак для маладых спецыялістаў(-ак);
- удзел у падрыхтоўцы праектаў Канстытуцыі і законаў будучай дэмакратычнай Беларусі.
Планы
Альянс працягвае пашырацца і ставіць перад сабой наступныя задачы:
- развіццё сеткі групаў у новых краінах;
- падпісанне дадатковых мемарандумаў аб супрацоўніцтве;
- імплементацыя «Люксембургскіх рашэнняў» у нацыянальнае заканадаўства краінаў-чальцоў;
- узмацненне каардынацыі паміж парламентарыямі, міжнароднымі структурамі і беларускімі дэмакратычнымі сіламі.
Кантакты
Па ўсіх пытаннях, звязаных з працай Альянса, звяртайцеся па адрасе: alliance.belarus@tsikhanouskaya.org.
