Што за Валанцёрская праграма?
Каманда Святланы Ціханоўскай – гэта не толькі Офіс нацыянальнай лідаркі, але і яго валанцёры і валанцёркі. Яны дапамагаюць сваімі ведамі, навыкамі і часам і вырашаюць штодзённыя працоўныя задачы на шляху да вольнай і дэмакратычнай Беларусі.
І як валанцёры дапамагаюць Офісу?
Яны выконваюць такія задачы, як пошук інфармацыі, напісанне і пераклад тэкстаў, расшыфроўка відэа- і аўдыяматэрыялаў, маніторынг медыя, стварэнне дызайнаў. Задачаў шмат, і кожны і кожная змогуць знайсці штосьці для сябе. Больш пра задачы вы можаце прачытаць у нашай справаздачы за 2023 год.
Калі вы жывяце за мяжой, мы можам прапанаваць вам удзел у афлайн-мерапрыемствах – напрыклад, дапамогу ў іх арганізацыі і правядзенні. Але ці прымаць прапанову – выбар ваш.
Хто можа стаць валанцёрам і валанцёркай?
Любы беларус ці беларуска! Галоўнае патрабаванне – падзяляць каштоўнасці Офіса. Рашэнне аб вашым далучэнні да Валанцёрскай праграмы прымаецца на падставе вашага матывацыйнага ліста ў заяўцы.
А што ад валанцёрства мне?
- Вы можаце дапамагаць дэмакратычнаму руху ў тым кірунку і ў тым аб’ёме, у якіх можаце. У новай Беларусі вы будзеце ведаць, што вы былі датычныя да пераменаў. Крута, праўда?
- Таксама валанцёрства – добрая магчымасць развіць свае навыкі і навучыцца новаму. Мы заўсёды даем зваротную сувязь і кажам, як можна было б палепшыць вашую працу.
- Калі вы актыўна адклікаецеся на нашыя просьбы, мы можам разглядзець для вас магчымасць напісання рэкамендацыі. Гэта вам можа дапамагчы пры паступленні ва ўніверсітэт ці пошуку працы.
- Часам мы ладзім сустрэчы для валанцёраў і валанцёрак са Святланай Ціханоўскай. Вы можаце задаць пытанні і падзяліцца сваім меркаваннем па праблемах, што вас цікавяць.
- Мы вядзём канал з рознымі магчымасцямі для валанцёраў і валанцёрак – там вы можаце знайсці стыпендыі, гранты, курсы, канферэнцыі, праграмы валанцёрства і шмат чаго яшчэ.
А колькі часу трэба для валанцёрства?
Гэта вырашаеце вы. Мы публікуем задачы ў агульным канале для ўсіх валанцёраў. Калі вы гатовыя дапамагчы з канкрэтнай задачай – вы звязваецеся з намі і выконваеце яе. Калі не гатовыя – значыць, гэтую задачу выканае нехта іншы.
Мы шануем рэгулярную дапамогу, таму будзем удзячныя, калі вы будзеце адгукацца на нашыя просьбы часцей. Але мы разумеем, калі ў вас экзамены, шмат працы ці іншыя складанасці, таму не патрабуем дапамогі ў такіх выпадках.
І як далучыцца да Валанцёрскай праграмы?
Праз бот @AskOffice_bot у тэлеграме. Запусціце бот, націсніце «Хачу стаць валанцёрам» і адкажыце на пытанні. Можна назваць несапраўднае імя. Калі бот ужо запушчаны, а кнопкі няма, праз тры кропкі націсніце «Ачысціць гісторыю» і запусціце бот зноў.
Бот абсалютна бяспечны, але для сваёй бяспекі – калі вы ў Беларусі – не забудзьцеся выдаліць яго. Інструкцыя па спасылцы.
А ці гэта бяспечна?
Далучаючыся, памятайце, што Офіс Святланы Ціханоўскай прызнаны ў Беларусі «экстрэмісцкім фарміраваннем». Стаць часткай яго Валанцёрскай праграмы – гэта ваш выбар, але са свайго боку мы гарантуем канфідэнцыяльнасць вашых даных.
Большасць нашых задачаў – у анлайн-фармаце. Мы не просім людзей у Беларусі выконваць задачы, якія звязаныя з відавочнай небяспекай. Для анлайн-задачаў мы прапануем захады бяспекі. Чытайце пра іх у гайдзе.
Што кажуць валанцёры?
Кантакты
Сачыце за Валанцёрскай праграмай у тэлеграм-канале – над ім, дарэчы, таксама шмат у чым працуюць валанцёры Офіса: https://t.me/volunteersOST.
Любыя пытанні можна задаць у @AskOffice_bot або праз электронную пошту volunteers@tsikhanouskaya.org.
