Польскае ўпраўленне па справах іншаземцаў дало тлумачэнне пра легальны статус знаходжання для беларусаў, якія прыбылі з Украіны на тэрыторыю Польшчы.
Беларусы могуць скарыстацца часовай абаронай у адпаведнасці з Законам аб прадастаўленні абароны іншаземцам, калі яны прыбылі з Украіны і трапляюць пад адзін з пунктаў:
– могуць даказаць, што да 24 лютага 2022 года яны карысталіся міжнароднай абаронай або эквівалентнай нацыянальнай абаронай ва Украіне;
– легальна пражывалі ва Украіне на падставе дзейнага дазволу на пастаяннае пражыванне, выдадзенага ў адпаведнасці з заканадаўствам Украіны;
– не могуць вярнуцца ў Беларусь з-за пагрозы жыццю і свабодзе.
У гэтым выпадку беларусы могуць бясплатна атрымаць дакумент, які пацвярджае іх часовую абарону. Сертыфікат выдаецца Упраўленнем па справах замежнікаў па заяве замежніка. Яго можна забраць асабіста ў офісе ў Варшаве на вул. Табарава, 33. Звяртацца па яго можна з 17 сакавіка 2022 года.
Дакумент з'яўляецца выключным доказам часовай абароны ў Польшчы. На працягу тэрміна яго дзеяння пацвярджае права:
– пражываць на тэрыторыі Польшчы;
– выконваць працу без неабходнасці мець дазвол на працу;
– займацца эканамічнай дзейнасцю на тэрыторыі Польшчы на тых жа ўмовах, што і польскія грамадзяне;
– атрымліваць медыцынскую дапамогу ва Упраўленні па справах замежнікаў;
– атрымліваць дапамогу ў выглядзе пражывання, харчавання або матэрыяльнай дапамогі.
Каманда Офіса Святланы Ціханоўскай знаходзіцца ў пастаянным кантакце з Дырэктарам дэпартамента ўцякацкіх працэдураў Анджэем Карпяком. Заўтра, 16 сакавіка, на сайце Упраўлення па справах замежнікаў будзе размешчаны дадатковы інфармацыйны буклет непасрэдна для беларусаў.
