30 кастрычніка ў Таліне міністр замежных справаў Эстоніі Маргус Цахкна прыняў Святлану Ціханоўскую ў Міністэрстве замежных справаў Эстоніі. З нагоды візіту беларускай лідаркі ў будынку міністэрства былі выстаўленыя дзяржаўныя сцягі Эстоніі і беларускія нацыянальныя бел-чырвона-белыя сцягі.
Святлана Ціханоўская падзякавала Маргусу Цахкну за яго асабістую падтрымку дэмакратычнай Беларусі, паслядоўную пазіцыю ў абароне беларускага суверэнітэту і дапамогу беларускім палітвязням праз Міжнародны гуманітарны фонд. Яна таксама адзначыла важнасць працы Місіі дэмакратычных сілаў Беларусі ў Таліне і падтрымкі, якую Эстонія аказвае беларускаму грамадству на міжнародным узроўні.
Падчас сустрэчы абмеркавалі шэсць асноўных кірункаў супрацоўніцтва.
1. Вызваленне палітычных зняволеных і спыненне рэпрэсій
Адной з цэнтральных тэмаў стала вызваленне беларускіх палітвязняў. Бакі абмеркавалі магчымасці далейшай каардынацыі намаганняў Эстоніі, Еўрапейскага саюза і ЗША для вызвалення людзей, якія застаюцца за кратамі па палітычных матывах.
Святлана Ціханоўская падкрэсліла, што вызваленне кожнага чалавека мае вялікае значэнне, аднак разам з гэтым неабходна дамагацца спынення палітычнага пераследу і рэпрэсій у Беларусі.
Асобна закранулі ролю міжнародных механізмаў падтрымкі палітвязняў і іх сем’яў, у тым ліку Міжнароднага гуманітарнага фонду дапамогі беларускім палітзняволеным. Ціханоўская падзякавала Эстоніі за ўдзел у гэтай працы і падтрымку людзей, якія пацярпелі ад рэпрэсій.
2. Абарона правоў і дапамога беларусам у Эстоніі
Асобную ўвагу надалі становішчу беларусаў, якія жывуць у Эстоніі, у тым ліку тых, хто быў вымушаны пакінуць Беларусь праз палітычны пераслед.
Абмеркавалі пытанні легалізацыі, атрымання і падаўжэння дакументаў, а таксама абмежаванні, якія могуць закранаць беларускіх грамадзян. Святлана Ціханоўская заклікала ўлічваць асаблівае становішча беларускіх уцекачоў пры распрацоўцы і прымяненні абмежавальных мераў.
Яна падкрэсліла важнасць таго, каб беларускіх грамадзян, якія пацярпелі ад дзеянняў рэжыму Лукашэнкі, не атаясамлівалі з самім рэжымам. Пытанні бяспекі павінны вырашацца з улікам абставінаў людзей, якія шукаюць абароны і магчымасці наладзіць сваё жыццё ў Эстоніі.
3. Візавыя пытанні
Падчас сустрэчы таксама абмеркавалі магчымасці выдачы візаў беларусам, якія знаходзяцца ў трэціх краінах і не могуць бяспечна вярнуцца на радзіму.
Для многіх беларусаў, якія вымушана жывуць за мяжой, пытанні дакументаў і магчымасці перамяшчэння застаюцца асабліва актуальнымі. Ціханоўская звярнула ўвагу на неабходнасць пошуку практычных рашэнняў, якія дазволілі б такім людзям атрымліваць неабходныя дакументы і захоўваць сувязі з еўрапейскімі краінамі.
4. Падтрымка Украіны
Святлана Ціханоўская і Маргус Цахкна абмеркавалі далейшую падтрымку Украіны і магчымасці супрацоўніцтва беларускіх дэмакратычных сілаў з украінскімі і эстонскімі партнёрамі.
Асобнай тэмай стала падрыхтоўка да міжнароднай Канферэнцыі па аднаўленні Украіны, якая пройдзе 28–29 студзеня 2027 года ў Таліне. Абмеркавалі магчымасці ўдзелу беларускіх дэмакратычных сілаў у канферэнцыі і будучых ініцыятывах па аднаўленні Украіны.
Ціханоўская падкрэсліла, што беларускія дэмакратычныя сілы зацікаўленыя ў далейшым развіцці супрацоўніцтва з Украінай. Яна адзначыла, што дэмакратычная Беларусь у будучыні можа стаць партнёрам Украіны ў аднаўленні краіны пасля расійскай агрэсіі.
5. Сумесная праца на міжнароднай арэне
Бакі абмеркавалі далейшую каардынацыю пазіцый і ініцыятываў у Арганізацыі Аб’яднаных Нацый, Арганізацыі па бяспецы і супрацоўніцтве ў Еўропе і Еўрапейскім саюзе.
Асобную ўвагу надалі захаванню беларускай тэмы ў міжнародным парадку дня, абароне незалежнасці Беларусі і супрацьдзеянню спробам міжнароднай легітымізацыі рэжыму Лукашэнкі без рэальных зменаў у краіне.
Таксама абмеркавалі падрыхтоўку да Беларускіх дзён у Бруселі і магчымасці далейшага супрацоўніцтва Эстоніі з беларускімі дэмакратычнымі сіламі падчас міжнародных мерапрыемстваў.
Святлана Ціханоўская адзначыла, што падтрымка Эстоніі асабліва важная для прасоўвання беларускага пытання на еўрапейскім узроўні і захавання міжнароднай увагі да сітуацыі ў Беларусі.
6. Санкцыйная палітыка і прыцягненне рэжыму да адказнасці
Падчас сустрэчы абмеркавалі неабходнасць захавання санкцыйнага ціску на рэжым Лукашэнкі за рэпрэсіі супраць беларусаў, саўдзел у расійскай агрэсіі супраць Украіны і дзеянні, якія ствараюць пагрозы рэгіянальнай бяспецы.
Ціханоўская падкрэсліла важнасць узгодненай пазіцыі еўрапейскіх партнёраў. Паводле яе, намаганні па вызваленні палітвязняў павінны суправаджацца патрабаваннямі спыніць рэпрэсіі і не могуць служыць падставай для міжнароднай нармалізацыі адносінаў з рэжымам без сістэмных зменаў у Беларусі.
Бакі закранулі неабходнасць далейшых міжнародных намаганняў для прыцягнення вінаватых у рэпрэсіях і парушэннях правоў чалавека да адказнасці.
Незалежнасць Беларусі і будучыня рэгіянальнай бяспекі
Асобная частка размовы была прысвечаная пагрозам беларускаму суверэнітэту, расійскай вайсковай прысутнасці ў Беларусі і ўплыву вайны супраць Украіны на бяспеку ўсяго рэгіёна.
Святлана Ціханоўская падкрэсліла, што Беларусь не павінна стаць разменнай манетай у магчымых перамовах аб завяршэнні вайны. Любыя будучыя дамоўленасці аб рэгіянальнай бяспецы павінны ўлічваць незалежнасць і суверэнітэт Беларусі, а таксама неабходнасць недапушчэння далейшага выкарыстання беларускай тэрыторыі для расійскай ваеннай агрэсіі.
Ціханоўская адзначыла, што бяспека Беларусі цесна звязаная з бяспекай Украіны, краін Балтыі і ўсёй Еўропы. Таму захаванне беларускай незалежнасці павінна заставацца важнай часткай міжнародных абмеркаванняў будучыні рэгіёна.
Напрыканцы сустрэчы Святлана Ціханоўская яшчэ раз падзякавала Маргусу Цахкну і Эстоніі за шматгадовую падтрымку беларускага народа і дэмакратычных сілаў. Яна адзначыла важнасць далейшай сумеснай працы дзеля вызвалення ўсіх палітычных зняволеных, абароны правоў беларусаў, захавання незалежнасці Беларусі і ўмацавання бяспекі ў рэгіёне.
