Падчас візіту ў Рыгу дыпламатычны дарадца Святланы Ціханоўскай Дзяніс Кучынскі правёў сустрэчу з прадстаўніком Офіса прэм’ер-міністра Латвіі Іварса Ліепніексам.
Сустрэча была прысвечаная пытанням рэгіянальнай бяспекі, супрацьдзеянню правакацыям з боку рэжыму Лукашэнкі і дапамозе беларускай супольнасці ў Латвіі ды ЕС.
Ключавыя тэмы абмеркавання:
- Супрацьдзеянне гібрыдным атакам. Афіцыйныя асобы абмеркавалі сітуацыю на супольнай мяжы і рост гібрыднага ціску з боку рэжыму Лукашэнкі, у тым ліку штучна арганізаваны міграцыйны крызіс і спробы пранікнення праз падземныя тунэлі.
- Санкцыйны ціск. Кучынскі адзначыў неабходнасць далейшага жорсткага зачынення шчылінаў у санкцыях, узмацнення эканамічных абмежаванняў супраць прадпрыемстваў рэжыму і прыцягнення да адказнасці асоб, датычных да ваенных злачынстваў і рэпрэсіяў.
- Сітуацыя з закрыццём межаў. Дзяніс Кучынскі адзначыў, што дэмакратычныя сілы цалкам разумеюць занепакоенасць Латвіі сваёй бяспекай і вымушаныя меры па кантролі і закрыцці памежных пунктаў. Разам з тым, ён заклікаў падзяляць рэжым і беларусаў і не абмяжоўваць людзей у магчымасці свабодна перамяшчацца.
- Падтрымка беларускай дыяспары ў Латвіі. Асобная ўвага падчас размовы была нададзеная становішчу беларусаў, якія жывуць у Латвіі. Падкрэслена важнасць гуманных падыходаў да легалізацыі, уключаючы вырашэнне пытанняў з пратэрмінаванымі пашпартамі і праязнымі дакументамі, а таксама прадастаўленне магчымасцяў для развіцця беларускай культуры, медыя і цывільных ініцыятыў у Латвіі.
Дзяніс Кучынскі падзякаваў Латвіі за непахісную пазіцыю па непрызнанні легітымнасці Лукашэнкі і падтрымку еўрапейскага выбару беларускага народа. Ён адзначыў важнасць працягу сумеснай працы на міжнародных пляцоўках для ізаляцыі рэжыму.
