Святлана Ціханоўская сустрэлася ў Варшаве з дакладчыцай ПАРЕ па тэме «Разгляд культуры як асновы дэмакратызацыі Беларусі» Агнешкай Памаскай і кіраўніцай сакратарыята Камітэта ПАРЕ па культуры, навуцы, адукацыі і медыя Таццянай Тэрмачыч. Сустрэча адбылася ў межах падрыхтоўкі даклада ПАРЕ «Addressing culture as a foundation for the democratisation of Belarus».
Ціханоўская падзякавала ПАРЕ за тое, што тэма беларускай культуры стала асобным напрамкам працы Асамблеі. Яна адзначыла, што ва ўмовах русіфікацыі і рэпрэсій падтрымка беларускай культуры і мовы — гэта пытанне захавання нацыянальнай ідэнтычнасці і важная ўмова будучых дэмакратычных пераменаў.
Будучы даклад ПАРЕ плануе разгледзець становішча беларускай культуры ўнутры краіны і ў выгнанні, русіфікацыю і расійскую прапаганду, становішча рэпрэсаваных дзеячаў культуры, ролю беларускай мовы, транснацыянальныя рэпрэсіі, а таксама культурныя ініцыятывы, якія беларусы стварылі пасля 2020 года за мяжой. Асобная ўвага будзе нададзеная беларусам у Польшчы і сувязям паміж гістарычнай беларускай меншасцю і новай дыяспарай.
Ціханоўская таксама асобна падзякавала ПАРЕ за «Люксембургскія рашэнні» — даклад з комплексам рэкамендацый па падтрымцы беларусаў у выгнанні, які выкарыстоўваецца ў працы з еўрапейскімі ўрадамі.
