У Беларусі распачаліся вучэбна-палявыя зборы для вучняў 10‑х класаў: з гэтага года яны ўключаныя ў абавязковую навучальную праграму.
Дарадца Святланы Ціханоўскай па моладзевай палітыцы і студэнцтве Маргарыта Ворыхава дала каментар наконт новаўвядзення ў сістэму адукацыі:
«Лукашэнка пазіцыяніруе сябе як чалавека, які трымае вайну далей ад Беларусі. Але калі гэта сапраўды так, чаму ваенная логіка ўціскаецца ў школы?
Упершыню ў Беларусі палявыя лагеры для 10-х класаў сталі абавязковымі. У Гомельскай вобласці школьнікаў уводзяць у ваеннае асяроддзе ў межах навучальнай праграмы — з формай, вучэннямі, зброяй і прамовамі чыноўнікаў і вайскоўцаў. У некаторых лагерах падлеткам не хапала намётаў, і яны спалі ў школьных спартзалах.
Гэта не бяскрыўднае «патрыятычнае выхаванне». Гэта нармалізацыя мілітарызацыі з ранняга ўзросту. Яна вучыць дзяцей паслухмянасці, а не свабодзе. Яна пераконвае моладзь, што дзяржава вызначае іх будучыню, перш чым яны самі атрымаюць магчымасць выбраць яе.
Шырэйшая сістэма робіць гэта яшчэ больш відавочным. Паводле звестак факультэта ваеннай справы, у Беларусі ўжо ёсць 337 ваенна-патрыятычных класаў у 220 школах, каля 300 ваенна-патрыятычных клубаў з удзелам каля 8000 чалавек, 9 кадэцкіх вучылішчаў і 736 ваенна-патрыятычных лагераў, праз якія за адно лета прайшлі каля 27 000 маладых людзей.
Міністэрства адукацыі таксама ўвяло 1730 пасадаў для ваенна-патрыятычных кіраўнікоў, і 82% з іх — былыя вайскоўцы або супрацоўнікі службаў бяспекі. Акрамя гэтага, уступныя экзамены ў ваенныя ВНУ былі адменены для выпускнікоў ваенна-патрыятычных класаў і кадэцкіх вучылішчаў, што зрабіла гэты шлях яшчэ больш інстытуцыяналізаваным.
Аднак моладзь нельга ператвараць у рэзерв для сілавых структураў. Яна павінна расці без навязанай ваеннай рыторыкі і свабодна выбіраць свой уласны шлях. Вайну нельга рамантызаваць і прадстаўляць дзецям як натуральную будучыню іх краіны».
