Святлана Ціханоўская накіравала афіцыйны зварот да Прэзідэнта Украіны з просьбай падтрымаць і паскорыць прыняцце закона, які вызначае прававы статус беларускіх добраахвотнікаў у краіне.
Праца над законапраектам пачалася яшчэ ў сакавіку — як вынік круглага стала, які прайшоў у Кіеве з удзелам прадстаўнікоў дэмакратычных сілаў Беларусі, Міхаіла Падаляка, дарадцы Офіса Прэзідэнта Уладзіміра Зяленскага, а таксама дэпутатаў Вярхоўнай Рады і намесніка міністра па справах ветэранаў.
Закон павінен вырашыць шэраг істотных праблемаў: ад атрымання грамадзянства і легалізацыі да пытанняў матэрыяльнага і сацыяльнага забеспячэння.
Каманда Святланы Ціханоўскай уважліва сочыць за сітуацыяй і добра ведае пра праблемы, з якімі сутыкаюцца беларускія добраахвотнікі ва Украіне. Каб гэтыя пытанні вырашаліся хутчэй, мы пастаянна падтрымліваем сувязь з украінскімі ўладамі.
Зварот да Прэзідэнта Зяленскага — чарговы крок, каб паскорыць працэс. Мы спадзяёмся, што разам з украінскім бокам зможам дасягнуць станоўчага вырашэння гэтых пытанняў.
