Падчас візіту ў Капенгаген Святлана Ціханоўская сустрэлася з міністаркай па еўрапейскіх справах Даніі Мары Б’ерэ. У сустрэчы таксама ўзялі ўдзел каманда Офіса, Сяргей Ціханоўскі і прадстаўнік Аб’яднанага Пераходнага Кабінета па нацыянальным адраджэнні Павел Баркоўскі.
У цэнтры размовы — еўрапейская будучыня Беларусі і падрыхтоўка да дэмакратычных пераменаў. Ціханоўская падкрэсліла, што змены ў Беларусі могуць пачацца раней, чым у Расіі, таму Еўрасаюз павінен заставацца гатовым падтрымаць дэмакратычныя працэсы. Яна адзначыла неабходнасць быць гатовымі да новага акна магчымасцяў і магчымых сцэнарыяў транзіту ўлады ў Беларусі.
Асобная ўвага была нададзеная наступным тэмам:
- Еўрапейскі выбар Беларусі. Цягам старшынства Даніі ў Еўрапейскім саюзе плануецца падрыхтаваць дарожную карту патэнцыйнага набліжэння Беларусі да Еўрасаюза і прэзентаваць праекты рэформаў, якія неабходна правесці ў краіне.
- Жаночае лідарства. Адной з асобных тэмаў стала роля беларускіх жанчын у палітыцы і грамадзянскай супольнасці. Ціханоўская распавяла пра ініцыятыву стварэння Акадэміі жаночага лідарства і падкрэсліла важнасць падтрымкі жанчын, якія працягваюць сваю працу нягледзячы на рэпрэсіі. Былі абмеркаваныя дадатковыя ініцыятывы падтрымкі жаночага лідарства ў Беларусі.
- Адукацыя і культура. Павел Баркоўскі прадставіў прапановы па дарожных картах у сферы адукацыі і культуры. Абмяркоўвалася таксама магчымасць далучэння беларускіх арганізацыяў да агульнаеўрапейскіх праграмаў, правядзенне сумесных культурніцкіх мерапрыемстваў і праграмаў для моладзі. Асобна абмеркавалі культурніцкае супрацоўніцтва і ўдзел беларусаў у еўрапейскіх культурніцкіх праектах.
- Праваабарона і санкцыі. Абмяркоўвалася, як зрабіць санкцыі больш эфектыўнымі для вызвалення палітвязняў і спынення рэпрэсіяў, і якая падтрымка будзе неабходная пры магчымым вызваленні і дэпартацыі 1300 палітвязняў.
- Бяспека і рэгіянальныя рызыкі. Ціханоўская прэзентавала Red Paper па ролі Беларусі ў рэгіянальнай бяспецы і звярнула ўвагу на вучэнні «Захад-2025» і рызыкі, якія яны выклікаюць.
- Дыпламатычнае супрацоўніцтва. Абмеркавалі магчымасці дыпламатычнага супрацоўніцтва і сумесных івэнтаў восенню, а таксама падтрымку беларускай супольнасці праз еўрапейскія структуры.
Ціханоўская падкрэсліла, што вельмі важна, каб падчас прэзідэнцтва Даніі ў Радзе Еўрасаюза беларускае пытанне заставалася на еўрапейскім парадку дня, і выказала ўдзячнасць за дапамогу, якую Данія аказвае цяпер. Яна падзякавала за падтрымку праваабарончых і адукацыйных ініцыятываў, культурніцкіх праграмаў, а таксама за дапамогу амбасады Даніі ў Вільні.
