На саміце НАТА беларуская лідарка сустрэлася з Хакімам Джэфрысам – лідарам дэмакратаў у Палаце прадстаўнікоў ЗША.
Падчас сустрэчы Ціханоўская падзякавала за падтрымку беларускага народа і кампаніі салідарнасці з палітычнымі вязнямі ў Беларусі, распавяла пра сітуацыю з апошнімі новымі прысудамі, а таксама пра рэпрэсіі супраць беларусаў за мяжой.
Акрамя таго, беларуская лідарка заклікала Кангрэс прыняць новае выданне Акта аб дэмакратыі ў Беларусі, павялічыць падтрымку грамадзянскай супольнасці, рэпрэсаваным, а таксама незалежным журналістам, культурніцкім праектам і ініцыятывам. Ціханоўская і Джэфрыс разглядзелі супрацоўніцтва з такімі тэхналагічнымі кампаніямі-гігантамі, як Facebook і Google у напрамку барацьбы з дэзынфармацыяй.
Палітыкі гаварылі і пра кампанію 2025 года. Ціханоўская адзначыла, што гэта нельга назваць выбарамі, бо яны не будуць ні свабоднымі, ні дэмакратычнымі. Асобна быў абмеркаваны абыход санкцыяў і шляхі закрыцця шчылінаў, а таксама прыцягненне рэжыму да адказнасці.
