Святлана Ціханоўская сустрэлася з новым спікерам літоўскага Сейма Саўлюсам Сквярнялісам. На сустрэчы ў Вільні абмяркоўваліся спосабы вызвалення палітвязняў і падтрымка беларусаў у Літве, непрызнанне фальшывых «выбараў» у Беларусі, пагрозы рэгіянальнай і нацыянальнай бяспекі, а таксама беларуска-літоўскія адносіны.
Пра што ішлі размовы:
📌 Вызваленне палітвязняў. Святлана Ціханоўская заклікала ўзмацніць міжнародны ціск на рэжым, каб дамагчыся вызвалення ўсіх несправядліва асуджаных людзей у Беларусі.
📌 Падтрымка супольнасці ў Літве. Былі разгледжаныя шляхі паляпшэння легалізацыі і ўмоваў жыцця беларусаў, якія знаходзяцца ў Літве. Акрамя гэтага, уздымаліся пытанні інтэграцыі беларускай дыяспары ў культурнае і эканамічнае жыццё краіны.
📌 Непрызнанне «выбараў». Святлана Ціханоўская і Саўлюс Сквярняліс пагадзіліся, што «бязвыбары», якія ладзіць рэжым Лукашэнкі, нельга прызнаваць легітымнымі. Спікер падкрэсліў, што гэта фарсавы працэс, і палітычныя рашэнні неабходна прымаць, не чакаючы яго завяршэння.
📌 Пагрозы рэгіянальнай бяспецы. Аналізаваліся пагрозы ад рэжыму Лукашэнкі: прысутнасць расійскіх войскаў і ўзбраення на тэрыторыі Беларусі, што ставіць пад пагрозу рэгіянальную стабільнасць і памежную бяспеку.
📌 Супрацоўніцтва з літоўскім парламентам. Святлана Ціханоўская прапанавала Сейму прыняць рэзалюцыю аб непрызнанні выбараў у Беларусі. Таксама закраналася супрацоўніцтва ў рамках групы «За дэмакратычную Беларусь» і арганізацыя сумесных ініцыятываў.
Святлана Ціханоўская: «Дзякую спікеру Саўлюсу Сквярнялісу, Сейму, ураду і народу Літвы за іх нязменную падтрымку беларусаў. Літва – наш надзейны партнёр у змаганні за свабоду. Асабіста дзякую спікеру Сквярнялісу за дапамогу, якую ён аказаў беларусам у 2020 годзе».
