Напачатку званка беларуская лідарка падзякавала нарвежскаму ўраду за падтрымку беларускіх незалежных медыя і праваабаронцаў.
Пасля бакі абмеркавалі сітуацыю з палітвязнямі. Ціханоўская распавяла пра тое, што іх трымаюць у рэжыме інкамунікада – у тым ліку Сяргея Ціханоўскага, Мікалая Статкевіча і Марыю Калеснікаву. Ціханоўская адзначыла, што неабходна дабівацца доступу ў турмы і вызвалення ўсіх незаконна асуджаных. Святлана Ціханоўская і Эспэн Барт Эйдэ абмеркавалі рэабілітацыю палітвязняў, якія выходзяць з турмаў, і падтрымку сем’яў рэпрэсаваных.
Беларуская лідарка заклікала міністра працягваць падтрымліваць праекты папулярызацыі беларускай культуры, літаратуры і мовы.
Ціханоўская прапанавала міністру Барт Эйдэ накіраваць запыт у Міжнародны крымінальны суд, каб пачаць разбіральніцтва датычнае дыктатара Лукашэнкі за злачынствы супраць чалавечнасці і незаконны вываз украінскіх дзяцей з акупаваных тэрыторыяў у Беларусь.
Таксама бакі абмеркавалі ўдзел дэмакратычных сілаў Беларусі ў мерапрыемствах Паўночнай рады, куды ўваходзяць Данія, Ісландыя, Нарвегія, Швецыя і Фінляндыя.
Напрыканцы размовы міністар Эспэн Барт Эйдэ запрасіў беларускую лідарку наведаць Осла з афіцыйным візітам на пачатку 2024 года.
