12 сакавіка ў Жэневе лаўрэат Нобелеўскай прэміі міру і старшыня Праваабарончага цэнтра «Вясна» Алесь Бяляцкі і дарадца па прававых пытаннях Святланы Ціханоўскай Леанід Марозаў сустрэліся з Вярхоўным камісарам ААН па правах чалавека Фолькерам Цюркам.
Галоўны фокус сустрэчы — бягучая сітуацыя з правамі чалавека ў Беларусі, у тым ліку становішча палітвязняў і роля міжнародных механізмаў у абароне фундаментальных правоў і свабодаў.
Асабліва важным стаў удзел у сустрэчы Алеся Бяляцкага, які нядаўна быў вызвалены з турмы і распавёў Вярхоўнаму камісару пра становішча людзей у Беларусі, асабліва тых, хто знаходзіцца за кратамі. У размове Алесь Бяляцкі нагадаў пра неабходнасць пастаяннай увагі міжнароднай супольнасці да жахлівай сітуацыі ў краіне.
Таксама дарадца па прававых пытаннях Святланы Ціханоўскай Леанід Марозаў падчас сустрэчы падкрэсліў важнасць механізмаў маніторынгу правоў чалавека ў Беларусі ў рамках сістэмы ААН. Яны застаюцца ключавым інструментам для незалежнай фіксацыі парушэнняў, захавання міжнароднай увагі да сітуацыі ў краіне і падтрымкі ўніверсальных стандартаў правоў чалавека.
Дзякуем Вярхоўнаму камісару і яго камандзе за адкрыты дыялог і паслядоўную працу ў абароне правоў чалавека.
