Нашая місія – НЕЗАЛЕЖНАЯ ДЭМАКРАТЫЧНАЯ ЕЎРАПЕЙСКАЯ БЕЛАРУСЬ
Галоўныя мэты:
- Незалежнасць: ствараць умовы дзеля захавання беларускай дзяржавы і нацыі, супрацьстаяць спробам размывання суверэнітэту Беларусі, які знаходзіцца пад пагрозай з боку РФ, на фоне далейшай ізаляцыі нелегітымнага рэжыму Лукашэнкі дамагацца юрыдычнага ці фактычнага прызнання міжнароднай супольнасцю інстытутаў дэмакратычных сілаў Беларусі, забяспечыць улік нацыянальных інтарэсаў пры прыняцці рашэнняў на міжнародным узроўні.
- Дэмакратыя: узмацняць сістэму інстытутаў дэмакратычных сілаў і каардынацыю іх дзейнасці з грамадзянскай супольнасцю, працягваць ціск на нелегітымны рэжым, пашыраць магчымасці для абароны правоў і інтарэсаў беларусаў.
- Еўрапейскасць: прасоўваць тэзіс аб прыналежнасці Беларусі да агульнай сям’і народаў Еўропы, забяспечыць палітычную падтрымку еўрапейскаму выбару, ствараць пазітыўны імідж нашай краіны і дамагацца адкрытасці Еўропы для беларусаў.
- Беларускасць: захоўваць і ўзмацняць нацыянальную ідэнтычнасць (мову, культуру, гісторыю) у якасці неабходнага падмурка для існавання незалежнай беларускай дзяржавы, прасоўваць за мяжой ініцыятывы беларускай грамадзянскай супольнасці і дыяспары.
Асноўнымі суб’ектамі знешнепалітычнай дзейнасці з’яўляюцца:
- Нацыянальная лідарка Святлана Ціханоўская
- Каардынацыйная рада
- Аб’яднаны пераходны кабінет
- Офіс Святланы Ціханоўскай
- Прадстаўніцтвы дэмакратычных сілаў у замежных краінах.
1. НЕЗАЛЕЖНАСЦЬ
1.1. Замацаванне ў міжнародных (шмат- і двухбаковых) дакументах наступных тэзісаў:
- неабходнасць захаваць і ўзмацніць незалежнасць Беларусі, якая мае аднавіць свой бяз’ядзерны статус і стаць донарам рэгіянальнай бяспекі і стабільнасці;
- патрабаванні па вываду ядзернай зброі і расійскіх войскаў з тэрыторыі Беларусі;
- улік нацыянальных інтарэсаў беларусаў пры пабудове новай сістэмы рэгіянальнай бяспекі ў рамках мірнага (пераможнага) урэгулявання в Украіне.
1.2. Пашырэнне суб’ектнасці дэмакратычных сілаў Беларусі:
- замацаванне ў міжнародных дакументах тэзіса аб нелегітымнасці рэжыму А. Лукашэнкі, які не мае права прадстаўляць беларусаў, у тым ліку і пасля «прэзідэнцкіх выбараў» 2025 года, і аб мэтазгоднасці прызнання С. Ціханоўскай і структураў, створаных дэмакратычнымі сіламі Беларусі (Каардынацыйная рада, Аб’яднаны пераходны кабінет) як рэальных праваднікоў беларускіх інтарэсаў:
- узмацненне палітычнай і дыпламатычнай ізаляцыі рэжыму і павелічэнне круга краінаў з усіх рэгіёнаў свету, якія падтрымліваюць такую палітыку;
- інстытуцыялізацыя адносінаў з партнёрскімі краінамі (па прыкладу ЗША і Канады) і міжнароднымі арганізацыямі (па прыкладзе ЕС, РЕ, АБСЕ);
- забеспячэнне ўдзелу прадстаўнікоў дэмакратычных сілаў Беларусі ў ключавых міжнародных самітах і форумах з мэтай прасоўвання беларускай павесткі;
- развіццё сеткі замежных прадстаўніцтваў дэмакратычных сілаў Беларусі.
2. ДЭМАКРАТЫЯ
2.1. Узмацненне структураў дэмакратычных сілаў:
- забеспячэнне ўстойлівасці палітычных і грамадзянскіх структураў дэмакратычных сілаў, уключаючы фінансаванне іх дзейнасці:
- пашырэнне ўзаемадзеяння з урадамі і парламентамі замежных краінаў, а таксама міжнароднымі арганізацыямі з мэтай пашырэння падтрымкі дэмакратычных сілаў;
- заахвочванне міжнародных партнёраў да прыняцця комплексных рашэнняў аб падтрымцы дэмакратыі ў Беларусі;
- спрыянне падрыхтоўцы кадраў, распрацоўцы праектаў рэформаў для аптымальнага пераходу да дэмакратычнага кіравання;
- сістэматычнае інфармаванне міжнароднай супольнасці па актуальных праблемах узнаўлення дэмакратыі ў Беларусі;
- міжнародная кампанія па непрызнанню выбараў 2025:
- арганізацыя інфармацыйнай кампаніі для беларусаў за мяжой;
- мабілізацыя міжнародных партнёраў (дэмакратычных краін, АБСЕ, ЕС, РЕ і іншых міжнародных арганізацыяў) з мэтай фарміравання агульнай пазіцыі па непрызнанню выбараў-2025.
2.2. Павелічэнне ціску на рэжым:
- падрыхтоўка прапановаў па ўвядзенню абмежавальных мераў, іх сінхранізацыі, а таксама захадаў па прадухіленню абыходу санкцыяў;
- прававая і інфармацыйная падтрымка ініцыятываў па прыцягненню да адказнасці ў МКС асобаў, якія здзейснілі злачынствы супраць чалавечнасці, а таксама ваенныя злачынствы;
- мабілізацыя міжнародных партнёраў на палітычную і дыпламатычную падтрымку ініцыятывы Літвы па перадачы на разгляд МКС сітуацыі адносна злачынстваў супраць чалавечнасці.
2.3. Вызваленне палітычных зняволеных:
- узгадненне стратэгіяў вызвалення палітвязняў і арганізацыя міжнароднага супрацоўніцтва для дасягнення гэтай мэты;
- забеспячэнне фінансавай падтрымкі Міжнароднага гуманітарнага фонду;
- спрыянне падрыхтоўцы і рэалізацыі праграмаў рэабілітацыі, дапамогі і інтэграцыі для былых палітвязняў і членаў іх сямей.
2.4. Абарона правоў былых добраахвотнікаў і ветэранаў:
- прыцягненне ўвагі на міжнародным узроўні да пытання адвакацыі правоў былых добраахвотнікаў, ветэранаў і іх сем’яў як да мэтавай прыярытэтнай групы;
- прыцягненне фінансавай падтрымкі для былых і загінулых добраахвотнікаў і іх сем’яў;
- спрыянне падрыхтоўцы і рэалізацыі комплекснай дапамогі для былых добраахвотнікаў, ветэранаў і іх сем’яў: медычнай рэабілітацыі, псіхалагічнай дапамогі, інтэграцыі ў краінах іх фактычнага пражывання (знаходжання).
2.5. Абарона правоў і інтарэсаў беларусаў:
- садзейнічанне легалізацыі беларусаў у выгнанні праз мэтанакіраваныя кантакты з уладамі краінаў іх знаходжання па пытаннях:
- міжнароднай і дадатковай аховы і пазбягання дэпартацыі;
- выдачы дакументаў для пацвярджэння асобы і для падарожжаў;
- прызнання дакументаў аб адукацыі, асабістых правах, маёмасці, грамадзянскім стане і інш.;
- спрыянне мабільнасці грамадзянаў Беларусі:
- прасоўванне ініцыятываў па спрашчэнні візавага рэжыму і паляпшэнні памежнага руху ў дачыненні да беларусаў, для зняцця візавых абмежаванняў і адкрыцця межаў для беларускіх грамадзянаў;
- падтрымка выдачы гуманітарных візаў, працэсаў эвакуацыі актывістаў і сваякоў;
- узаемадзеянне з міжнароднымі арганізацыямі з мэтай распрацоўкі захадаў па гарманізацыі падыходаў і правапрымяняльнай практыкі ў краінах знаходжання беларусаў;
- спрыянне развіццю адукацыйных праграмаў, якія накіраваныя на фарміраванне разумення дэмакратычных каштоўнасцяў, правоў чалавека і прынцыпаў грамадзянскай адказнасці сярод беларускай моладзі;
- мабілізацыя замежнага і прыватнага фінансавання ў падтрымку незалежных медыя і блогераў, ініцыятываў грамадзянскай супольнасці, праваабаронцаў і рэпрэсаваных.
3. ЕЎРАПЕЙСКАСЦЬ
3.1. Прасоўванне еўрапейскага выбару для Беларусі шляхам:
- замацавання тэзіса аб прыналежнасці беларусаў да еўрапейскай сям’і ў палітычных дакументах міжнародных партнёраў;
- правядзення экспертызы па перспектывах развіцця беларуска-еўрапейскага супрацоўніцтва ў розных галінах;
- заахвочвання ўдзелу прадстаўнікоў дэмакратычных сілаў у прэстыжных еўрапейскіх форумах і канферэнцыях;
- спрыяння арганізацыі адукацыйна-азнаямленчых візітаў беларусаў у партнёрскія арганізацыі ЕС і яго краінаў-членаў.
3.2. Забеспячэнне ўстойлівага прадстаўніцтва дэмакратычных сіл у рамках:
- інстытуцыйнага ўзаемадзеяння з Радай Еўропы і Еўрапейскім Саюзам;
- кантактаў з іншымі рэгіянальнымі і субрэгіянальнымі арганізацыямі;
- пашырэння экспертнага ўдзелу ў праграмах і мерапрыемствах Усходняга партнёрства.
4. БЕЛАРУСКАСЦЬ
4.1. Захаванне беларускай нацыі праз:
- развіццё і ўмацаванне нацыянальнай ідэнтычнасці праз падтрымку мовы, культуры і гістарычнай спадчыны, актыўную барацьбу з русіфікацыяй;
- супрацьстаянне расійскай прапагандзе, якая распаўсюджваецца праз дзяржаўныя СМІ.
4.2. Прасоўванне і падтрымка беларускіх ініцыятываў:
- наладжванне супрацоўніцтва з замежнымі партнёрамі па наступных напрамках:
- адукацыя і навука;
- культура і нацыянальнае адраджэнне;
- моладзь і студэнцтва;
- зялёная Беларусь;
- медыя;
- экспертная супольнасць і кадры;
- садзейнічанне пашырэнню ўдзела беларускіх прадстаўнікоў у міжнародных культурных праграмах і мерапрыемствах.
