У Капенгагене адбылася сустрэча Святланы Ціханоўскай з міністрам замежных справаў Даніі Ларсам Лёке Расмусенам і Вярхоўнай прадстаўніцай ЕС па замежнай палітыцы і бяспецы Каяй Калас. Абмяркоўваліся ключавыя пытанні, якія стаяць перад Беларуссю і ўсім рэгіёнам.
Тэмы, якім была нададзеная асаблівая ўвага падчас сустрэчы:
- Вызваленне палітвязняў
Больш за 1300 чалавек застаюцца за кратамі. Ціханоўская падкрэсліла неабходнасць каардынацыі намаганняў трансатлантычных партнёраў і развіцця праграмаў рэабілітацыі для тых, хто выходзіць на волю. - Беларусь і вайна супраць Украіны
Важнае пытанне — удзел рэжыму ў агрэсіі і будучым вучэнням «Захад-2025». Абмяркоўвалася ўзмацненне ціску на Лукашэнку. - Незалежнасць Беларусі
Ціханоўская акцэнтавала ўвагу на пагрозе страты дзяржаўнасці праз павелічэнне расійскай прысутнасці. - Бяспека беларусаў
Святлана Ціханоўская распавяла пра пераслед сем’яў палітвязняў, трансгранічны ціск і знікненні актывістаў. Удзельнікі ўзгаднілі неабходнасць новых механізмаў абароны. - Легалізацыя беларусаў у Еўрасаюзе
Ціханоўская заклікала выпрацаваць агульнае еўрапейскае рашэнне для людзей, якія праз рэпрэсіі вымушаныя жыць у Еўропе з часовымі дакументамі. - Прыцягненне рэжыму да адказнасці
Абмяркоўвалася ініцыятыва Літвы ў Міжнародным крымінальным судзе. Святлана Ціханоўская падкрэсліла: адказнасць павінна быць непазбежнай. - Падтрымка грамадзянскай супольнасці
Ціханоўская звярнула ўвагу на важнасць падтрымкі медыя, праваабаронцаў і культурніцкіх ініцыятываў — асновы дэмакратычнага руху.
Па выніках сустрэчы Святлана Ціханоўская адзначыла:
«Гэта была вельмі канструктыўная размова. Я ўдзячная Каі Калас і ўраду Даніі за лідарства ў падтрымцы Беларусі. Еўропа павінна заставацца прынцыповай і паслядоўнай у сваёй палітыцы. Вызваленне палітвязняў — наш прыярытэт, і гэта першы крок да больш сістэмных зменаў. Мы шмат гаварылі і пра падтрымку Украіны, бо ад лёсу Украіны залежыць і лёс Беларусі».
