Ціханоўская: «Дазвольце мне павіншаваць усіх нашых польскіх сяброў з нацыянальным святам Польшчы – Днём Канстытуцыі. Я зычу народу Польшчы нязменных дабротаў свабоды, дэмакратыі і – што не менш важна ў нашыя дні – вечнага міру.
Мы ў Беларусі ганарымся тым, што нашыя продкі былі датычныя да прыняцця першай у Еўропе напісанай дэмакратычнай Канстытуцыі.
Канстытуцыя 3 траўня – гэта не толькі нашая агульная гістарычная спадчына. Яна служыць супольнай для нас асновай для сапраўдных, каштоўнасных палітычных рашэнняў. Кожная гадавіна яе прыняцця – нагода ўспомніць пра галоўныя каштоўнасці, якія адстойвалі нашыя продкі.
Канстытуцыя 3 траўня падкрэслівае раўнапраўе ўсіх саслоўяў грамадства.
Яна забяспечвае падзел улады.
І нарэшце, паводле яе, не манарх, а народ з'яўляецца гарантам суверэнітэту дзяржавы.
І што асабліва важна для мяне, спадарыні і спадары, Канстытуцыя 3 траўня абвяшчае, што кожны грамадзянін краіны абавязаны абараняць яе свабоду.
Гэты прынцып стаў асабліва важным для народа Беларусі. Дыктатура – пагроза для незалежнасці дзяржавы. Лёс краіны не павінен быць у закладніках волі тырана.
Ідэі Канстытуцыі 3 траўня працягваліся ў ідэях свабоды і суверэнітэту, абвешчаных пад сцягамі паўстання, сярод адважных удзельнікаў якога быў і наш нацыянальны герой Кастусь Каліноўскі. Дарэчы, сёння многія беларусы адзначаюць Радаўніцу – традыцыйны дзень памінання тых, хто пайшоў, і ў іх ліку мы таксама шануем памяць удзельнікаў таго паўстання.
Я яшчэ раз падкрэслю: Беларусь адыгрывала неад'емную ролю ў гістарычным працэсе вызвалення нашых земляў. Каштоўнасці, выкладзеныя на старонках Канстытуцыі – акта з абавязковай сілай – на працягу стагоддзяў натхнялі актыўную частку беларускага грамадства.
Мы, як пераемнікі гэтых людзей, адчуваем сувязь часоў і бачым у Беларусі частку цэнтральна- і ўсходнееўрапейскай гісторыка-культурнай прасторы. Частка еўрапейскай цывілізацыі, свабодная, дэмакратычная, незалежная Беларусь павінна стаць найважнейшай часткай будучай архітэктуры бяспекі Балтыйска-Чарнаморскага рэгіёна.
Месца будучай свабоднай Беларусі, несумненна, у Люблінскім чатырохкутніку і ў сям'і еўрапейскіх народаў, як нам адпісваюць ідэі Канстытуцыі 3 траўня.
Дзякуй!»
