На тэлефанаванні Ціханоўская:
– Назвала запланаваны «рэферэндум» у Беларусі фарсам, і падкрэсліла, што рэжым страціў легітымнасць, а Канстытуцыя ў краіне не выконваецца. Яна расказала, што дэмакратычныя сілы заклікаюць беларусаў перакрэсліваць усе пазіцыі ў бюлетэнях, выказваючы пратэст супраць падману рэжыму. Міжнародная супольнасць не павінна верыць у падман рэжыму: «рэферэндум» не павінен быць прызнаны.
– Падкрэсліла важнасць падтрымання беларускага пытання на міжнародным парадку дня. Відавочна, што міжнародная супольнасць адзіная ў пазіцыі па сітуацыі ў Беларусі, але важна працягваць барацьбу і трымаць фокус на тым, што адбываецца ўнутры нашай краіны.
Асобна адзначыла важнасць захавання пытання Беларусі на павестцы Рады бяспекі ААН. Вымушаная пасадка самалёта Ryanair і крызіс на мяжы з ЕС паказваюць, што рэжым стаў пагрозай не толькі нацыянальнай, але і рэгіянальнай бяспецы.
– Распавяла пра створаны актыўны падпольны рух унутры Беларусі з актывістаў і валанцёраў, якія працягваюць барацьбу за перамены нягледзячы на рэпрэсіі.
– Абмеркавала з Сёрэйдэ рашэнне нарвежскай кампаніі Yara разарваць кантракт з Беларуськаліем. Ціханоўская падкрэсліла, што астатнія бізнесы могуць узяць прыклад з Yara і не падтрымліваць рэжым.
– Падзякавала Нарвегіі за дапамогу рэпрэсаваным беларусам, незалежным медыя, актывістам, ініцыяванне паседжання Рады бяспекі ААН па формуле Аррыя, Маскоўскага і Венскага механізмаў АБСЕ. Яна таксама падзякавала за падтрымку запуску міжнароднай платформы для дакументавання парушэнняў правоў чалавека ў Беларусі IAPB. Беларуская лідарка адзначыла – неабходна не толькі дакументаваць злачынствы рэжыму, але таксама прасоўваць справы ў межах міжнародных судоў і ўніверсальнай юрысдыкцыі, каб не было беспакаранасці.
Інэ Мары Эрыксан Сёрэйдэ адзначыла, што нядаўна сфармаваны ўрад Нарвегіі не мае нязгодаў з папярэднім (у межах якога Сёрэйдэ займала пасаду міністаркі замежных спраў Нарвегіі), які займаў жорсткую пазіцыю па крызісе і актыўна аказваў дапамогу беларусам. Ціханоўская таксама павіншавала Сёрэйдэ з прыняццем новай пасады кіраўніцы камітэта і падзякавала за аказаную беларусам падтрымку на пасадзе міністаркі.
