Лідарка дэмакратычнай Беларусі Святлана Ціханоўская заклікае далучыцца да Дня салідарнасці з Беларуссю 9 жніўня 2022 года. У гэты дзень беларусы адзначаюць другую гадавіну мірнага пратэсту, які адбыўся пасля скрадзеных прэзідэнцкіх выбараў у жніўні 2020 года. Нягледзячы на 2 гады бесперапынных рэпрэсій, беларусы працягваюць падпольны супраціў і дапамагаюць Украіне ў барацьбе супраць расійскай агрэсіі.
Далучайцеся да нас у святкаванні іх адвагі і рашучасці, публікуючы інфармацыю ў сваіх сацыяльных сетках (медыя-падборка прыкладаецца), дасылаючы ліст палітвязню, звяртаючыся да свайго мясцовага прадстаўніка з просьбай зрабіць заяву або далучаючыся да мясцовага мітынгу беларускай дыяспары.
Святлана Ціханоўская заклікае ўрады і парламенты, няўрадавыя арганізацыі і ініцыятывы, журналістаў і ўплывовых асобаў, дыяспары і бізнесменаў выкарыстоўваць гэты дзень, каб выказаць сваю салідарнасць з тымі, хто ў Беларусі змагаецца за дэмакратыю.
8-9 жніўня ў Вільні беларускія дэмакратычныя сілы правядуць Кангрэс новай Беларусі. Кангрэс дапаможа асэнсаваць мінулыя два гады беларускага супраціву, а таксама скарэктаваць стратэгію і структуру дэмакратычных сілаў.
Таксама плануецца правесці шэраг мерапрыемстваў у Беларусі, Вільні, Варшаве і ва ўсім свеце, каб адзначыць гераізм беларусаў.
Калі вы пішаце ў Твітары, публікуеце ці пішаце пра Беларусь, выкарыстоўвайце хэштэг #StandwithBelarus.
Што вы можаце зрабіць 9 жніўня:
- Беларуская дыяспара: Праводзьце мітынгі, канцэрты і публічныя мерапрыемствы.
- Мясцовыя органы ўлады і мэры гарадоў: Праецыруйце нацыянальныя колеры Беларусі – белы і чырвоны – на фасады грамадскіх будынкаў. Вывешвайце нацыянальны сцяг на фасадах і ў вокнах. Праводзьце прыёмы ў гонар беларусаў.
- СМІ і інтэрнет-інфлюенсеры: Павышайце дасведчанасць. Праводзьце і публікуйце інтэрв'ю з беларускімі палітычнымі лідарамі, журналістамі і тымі, чые сваякі сутыкнуліся з рэпрэсіямі. Публікуйце фотаздымкі, відэа і артыкулы ў падтрымку Беларусі з хэштэгам #StandwithBelarus.
- Парламентарыі, палітыкі: Выступайце з заявамі, якія выказваюць салідарнасць з Беларуссю. Ініцыюйце і прымайце рэзалюцыі ў падтрымку Беларусі. Ініцыюйце кампаніі па напісанні лістоў палітвязням ці станавіцеся апекунамі палітвязняў.
- Выкладчыкі школаў ці ўніверсітэтаў: Арганізуйце лекцыю ці дыскусію пра Беларусь і цяперашнія рэгіянальныя падзеі для вашай навучальнай установы. Арганізуйце кампанію па зборы лістоў для беларускіх палітвязняў.
- Аналітычныя цэнтры і навуковыя колы: Арганізуйце публічныя, віртуальныя, гібрыдныя ці афлайн мерапрыемствы, прысвечаныя крызісу ў Беларусі. Публікуйце мемарандумы з магчымымі рашэннямі і прапановамі для міжнароднай супольнасці.
- Усе сябры Беларусі: Падтрымайце беларусаў, робячы ахвяраванні ў фонды дапамогі палітвязням і іх сем'ям, такія як «Краіна для Жыцця», BySol, #BY_help або даслаўшы ім ліст падтрымкі. Адрасы і дадатковую інфармацыю вы можаце знайсці на сайце Viasna96.
