Дарадца Ціханоўскай па прававых пытаннях Крысціна Рыхтэр пракаментавала новую крымінальную справу супраць Зміцера Дашкевіча:
«Сёння меўся выйсці на волю актывіст, былы старшыня «Маладога фронту», бацька чацвярых дзяцей і вельмі шчыры чалавек Зміцер Дашкевіч. Але не выйшаў, бо супраць яго распачалі новую крымінальную справу па артыкуле 411 Крымінальнага кодэкса за «злоснае непадпарадкаванне патрабаванням адміністрацыі папраўчай установы, якая выконвае пакаранне ў выглядзе пазбаўлення волі». Гэты артыкул магчыма лёгка распачаць пасля некалькіх дысцыплінарных правінаў за непадшыты гузік ці трыманне рук у кішэнях.
Чалавек не выйшаў з турмы таму, што хтосьці ў камфортным кабінеце вырашыў разлучыць яго з жонкай і дзецьмі яшчэ на некалькі гадоў. Вырашыў, што Зміцер яшчэ «недастаткова» беспадстаўна знаходзіўся ва ўмовах, якія людскімі назваць вельмі цяжка.
Зміцер – сапраўдны герой нашай Радзімы. Рашучы, бескампрамісны і вельмі смелы чалавек, які сваімі ўчынкамі і агулам усім сваім жыццём паказвае нам любоў да Бацькаўшчыны і веру ў Бога.
Нехта там у кабінетах руйнуе нашыя жыцці, крадзе ў нас час, які мы можам правесці з блізкімі. І наіўна мяркуе, што застанецца неназваным і невядомым. Дарэмна».
