Святлана Ціханоўская сустрэлася з Вярхоўным камісарам ААН па правах чалавека Фолькерам Цюркам i распавяла пра сітуацыю з палітвязнямі, многія з якіх знаходзяцца ў крытычнай сітуацыі. Абмеркавалі сітуацыю з беларускімі ўцекачамі, якія пазбаўленыя падтрымкі беларускай дзяржавы і сутыкаюцца з шэрагам абмежаванняў.
Беларуская лідарка папрасіла Цюрка прыкласці намаганні, каб дабіцца доступу для адвакатаў і сем’яў да палітзняволеных, а таксама дамагчыся вызвалення ўсіх незаконна асуджаных. Папрасіла і працягнуць мандат спецдакладчыцы Анаіс Марын і экспертнай групы, якая збірае доказы парушэнняў правоў чалавека ў Беларусі.
Таксама Ціханоўская адзначыла, што трэба падняць пытанне Беларусі на бліжэйшай сустрэчы Рады па правах чалавека ААН, дзе будуць прадстаўленыя дзве справаздачы, звязаныя з Беларуссю: спецдакладчыцы па міграцыі і спецдакладчыцы па правах чалавека.
