​Святлана Ціханоўская – пра справаздачу ICAO па рэйсе Ryanair

Ціханоўская: «Сёння ICAO апублікавала справаздачу пра дэталі інцыдэнту з рэйсам FR4978 кампаніі Ryanair у паветранай прасторы Беларусі. Даклад быў прадстаўлены ўсім 193 дзяржавам-чальцам ICAO, уключаючы 36 краін, абраных у адмысловую Раду.

Я ўдзячная ICAO за публікацыю і старт публічнай працы па гэтай справе. Яшчэ летам мінулага года мая каманда звярнулася да прэзідэнта Рады ICAO з заклікам правесці дбайнае расследаванне па захопе самалёта і арышце Рамана Пратасевіча і Сафіі Сапега. З таго часу мы знаходзімся ў кантакце з кіраўніцтвам арганізацыі.

Наступны крок – 31 студзеня прадстаўнікі Рады ICAO правядуць дыскусію на аснове высноваў даклада. Гэта важны этап, таму што сённяшняя справаздача не назвала вінаватых, а толькі стала адпраўной кропкай у расследаванні злачынства. На дзеяннях рэжыму беларусы ўпэўніліся: парушыць закон можна за лічаныя секунды, а аднаўленне справядлівасці заўсёды патрабуе больш часу. Але мы даб'емся гэтага, і першыя крокі ўжо зробленыя».

17 студзеня 2022 в 21:52