Падчас візіту ў Прагу Святлана Ціханоўская правяла сустрэчу з беларускай супольнасцю Чэхіі. У ёй узялі ўдзел каля 20 чалавек — прадстаўнікі беларускай дыяспары, грамадскіх арганізацый і розных ініцыятываў.
Падчас сустрэчы абмеркавалі дзейнасць беларускай супольнасці ў Чэхіі, арганізацыю культурных і грамадскіх мерапрыемстваў, падтрымку беларусаў, якія былі вымушаныя пакінуць радзіму, а таксама магчымасці далейшага супрацоўніцтва з дэмакратычнымі сіламі Беларусі.
Асобную ўвагу надалі важнасці захавання беларускай ідэнтычнасці за мяжой, умацаванню сувязяў паміж дыяспарай і дэмакратычнымі сіламі, а таксама ролі беларусаў замежжа ў прыцягненні міжнароднай увагі да сітуацыі ў Беларусі.
Святлана Ціханоўская падзякавала ўдзельнікам за актыўнасць, салідарнасць і дапамогу беларусам:
«Я шчыра захапляюся тым, наколькі моцная, актыўная і згуртаваная беларуская дыяспара ў Чэхіі. Колькі ў вас энергіі, колькі цікавых ініцыятываў і жадання дапамагаць адно аднаму і Беларусі.
Для мяне вельмі каштоўна бачыць, што нават далёка ад дому беларусы не губляюць сувязі з Беларуссю, працягваюць дзейнічаць, аб’ядноўвацца і падтрымліваць тых, каму сёння асабліва патрэбная дапамога.
Дзякуй кожнаму, хто знайшоў час прыйсці. За вашу шчырасць, адкрытасць, за пытанні, ідэі і цёплую атмасферу».
