Сёння адвакаты рэжысёра Андрэя Гнёта атрымалі рашэнне Вышэйшага суда Бялграда аб магчымасці яго экстрадыцыі ў Беларусь. У выпадку яго выдачы для крымінальнага пераследу, Андрэя немінуча чакае сур’ёзны турэмны тэрмін за ягоную мірную грамадзянскую актыўнасць і рэалізацыю сваіх правоў.
Усе месяцы, пакуль Андрэй знаходзіўся пад вартай у Бялградзе, юрыдычная каманда Офіса Святланы Ціханоўскай прыкладала максімум намаганняў для таго, каб не дапусціць яго выдачы. Мы вялі актыўную камунікацыю з дыпламатычнымі прадстаўніцтвамі краін Еўрапейскага Саюза, юрыстамі, праваабаронцамі, адвакатамі і журналістамі для таго, каб беларус аказаўся на волі.
Важна адзначыць: рашэнне суда зусім не азначае, што нашыя намаганні былі марнымі. Офіс Святланы Ціханоўскай працягвае змагацца за свабоду Гнёта. Дыпламаты еўрапейскіх краінаў у Бялградзе ўжо праінфармаваныя пра рашэнне. Адвакаты Андрэя рыхтуюць дакументы для падачы апеляцыі. Яму таксама дадзеныя кантакты, каб у выпадку неабходнасці атрымаць юрыдычную дапамогу па падачы заявы ў Еўрапейскі Суд па Правах Чалавека. Таксама інфармацыя па справе Гнёта дасланая прадстаўнікам Еўрапейскай камісіі. Зразумела, мы працягваем заставацца на сувязі і з самім Андрэем – аказваем яму дапамогу і падтрымку.
Мы заклікаем усіх падтрымаць Андрэя ў гэтай барацьбе ўсімі магчымымі спосабамі!
Распаўсюджвайце інфармацыю пра сітуацыю Андрэем, калі для вас гэта бяспечна. Накіроўвайце лісты ў дыпламатычныя прадстаўніцтвы Сербіі з патрабаваннямі яго вызвалення. Мы робім усё магчымае, каб Андрэй змог пакінуць Сербію і перабрацца ў бяспечную трэцюю краіну. З вашай падтрымкай Андрэй нашмат хутчэй апынецца ў бяспецы і зможа ўбачыць блізкіх.
