Святлана Ціханоўская ўзяла ўдзел у панэльнай дыскусіі «Is Democracy in Trouble?», прысвечанай выклікам, з якімі сёння сутыкаюцца дэмакратыі ва ўсім свеце.
Дыскусія была прысвечаная таму, як у ўмовах глабальнай палярызацыі, інстытуцыйнай стомленасці і ціску з боку аўтарытарных рэжымаў захаваць адкрытасць грамадстваў і свабодны абмен ідэямі. У дыскусіі таксама прынялі ўдзел міністр замежных справаў Балівіі Фернанда Уга Арамаё, прафесарка паліталогіі Ельскага ўніверсітэта Элен Ландемор, міністр права і другі міністр унутраных справаў Сінгапура Эдвін Тонг.
У сваім выступе Святлана Ціханоўская падкрэсліла, што дэмакратыя можа быць сілай, але аўтарытарныя рэжымы навучыліся выкарыстоўваць яе слабасці, бо павольнасць дэмакратычных працэсаў, якія заснаваны на празрыстасці і дыскусіі, дыктатары кампенсуюць хуткасцю і жорсткасцю, не зважаючы на правілы і чалавечыя жыцці.
Святлана Ціханоўская:
«Дэмакратыя не ўзнікае сама па сабе. Над ёй трэба пастаянна працаваць і штодня яе абараняць. І гэта задача не толькі палітыкаў — гэта адказнасць усіх, каго яна датычыцца. Грамадзянскай супольнасці, бізнесу, медыя, кожнага чалавека. Я бачу, што і сёння людзі ўсё больш усведамляюць яе каштоўнасць і разумеюць, наколькі яна важная».
