Анджэй Дуда прыняў Святлану Ціханоўскую і прадстаўнікоў Аб’яднанага Пераходнага Кабінета ў прэзідэнцкай рэзідэнцыі ў Бельведэры. Да сустрэчы таксама далучыліся намеснік кіраўніцы Кабінета Павел Латушка, в.а. прадстаўніка па нацыянальным адраджэнні Кабінета Павел Баркоўскі, кіраўнік апарату Кабінета Валерый Мацкевіч, намеснік прадстаўніка па транзіце ўлады Кабінета Арцём Брухан, спікерка Каардынацыйнай Рады Анжаліка Мельнікава.
Святлана Ціханоўская: «Нас яднае Еўропа і свабода, жаданне жыць у бяспецы і міры… І нас сёння яднае агульны боль. Гэта і наш герой Анджэй Пачобут, і іншыя палітзняволеныя. І мы павінны змагацца, пакуль кожны і кожная не будуць на волі, пакуль кожны з нас не зможа бяспечна вярнуцца дадому».
Прэзідэнт Польшчы выказаў падтрымку беларускаму народу і пажадаў, каб у Беларусі як мага хутчэй адбыліся палітычныя змены, якія вернуць краіне свабоду, суверэнітэт і дэмакратыю.
У прамове Анджэй Дуда таксама згадаў пра рэпрэсіі, якія ўзмацняюцца напярэдадні «бязвыбараў». Асаблівы акцэнт прэзідэнт зрабіў на нядаўнім прысудзе ксяндзу Генрыху Акалатовічу, якога рэжым асудзіў на 11 гадоў зняволення ў калоніі. Анджэй Дуда адзначыў: гэты выпадак – яшчэ адзін сімвал таго, з чым даводзіцца сутыкацца ў сённяшняй Беларусі.
Прэзідэнт Дуда падкрэсліў сваю падтрымку свабоднай і незалежнай Беларусі:
«Нягледзячы на тое, што мая кадэнцыя набліжаецца да завяршэння, я назаўсёды застануся сябрам свабоднай і незалежнай Беларусі. Вы заўсёды можаце разлічваць на маю падтрымку, дзе б я ні знаходзіўся».
