Падчас першага дня візіту ў Вашынгтон Святлана Ціханоўская сустрэлася з экс-спікеркай Палаты Прадстаўнікоў ЗША Нэнсі Пэлосі, а таксама амерыканскімі сенатарамі Джын Шагін, Дзікам Дурбінам, Пітэрам Уэлчам.
Ціханоўская адзначыла неабходнасць амерыканскага лідарства ў супрацьстаянні дыктатарам, важнасць падтрымкі беларускай дэмакратычнай супольнасці, а таксама ціску на рэжым з мэтай вызвалення палітвязняў і спынення ўдзелу Беларусі ў вайне. Лідарка распавяла пра вынікі выбараў у Каардынацыйную Раду, а таксама пра планы дэмакратычных сілаў на 2025 год.
Падчас сустрэчы абмеркавалі:
📌 праект новага Акту аб дэмакратыі ў Беларусі, які ўмацуе суб’ектнасць дэмакратычных сілаў, а таксама можа стаць асновай для павелічэння падтрымкі Беларусі;
📌 кампанію ў падтрымку беларускіх палітвязняў, у прыватнасці – зняволеных беларускіх журналістаў, а таксама магчымыя крокі па іх вызваленні;
📌 пытанне санкцыяў;
📌 працяг і павелічэнне падтрымкі незалежных медыя, а таксама культурніцкіх і праваабарончых ініцыятываў;
📌падтрымку рэпрэсаваных;
📌мерапрыемствы па Беларусі падчас саміту НАТА;
📌падтрымку беларусаў у ЗША.
Ціханоўская заклікала раздзяляць беларускі народ і рэжым – і не дапусціць, каб Беларусь стала суцяшальным прызам для Пуціна.
