Адна з галоўных падзеяў працоўнага візіту Святланы Ціханоўскай у Прагу – сустрэча з прэзідэнтам Чэхіі Пятром Паўлам. Падчас размовы беларуская лідарка актуалізавала шэраг важных пытанняў. У прыватнасці, лідары абмеркавалі сітуацыю з палітвязнямі, жорсткія ўмовы ў турмах, а таксама варыянты шматбаковага ціску на рэжым.
Акрамя таго, ключавой тэмай дыялогу стала выцягванне Беларусі з вайны. Асобна Святлана Ціханоўская ўзняла пытанне еўрапейскага выбару Беларусі і заклікала прэзідэнта падтрымаць гэтую ініцыятыву. Напрыканцы сустрэчы беларуская лідарка ўручыла Пятру Паўлу крыж добрасуседства.
Пасля сустрэчы Ціханоўская адзначыла: «Я ўдзячная Чэхіі і чэшскаму прэзідэнту за цвёрдую пазіцыю – за падтрымку Украіны і свабоднай Беларусі. Самае важнае, што я хацела данесці: нельга адкладваць Беларусь на пасля і пакідаць яе Пуціну як суцяшальны прыз. Вырашэнне крызісу ў рэгіёне павінна быць комплексным і ўключаць у сябе Беларусь. Дэмакратычныя змены ў нашай краіне – інвестыцыя ў бяспеку Украіны і ўсёй Еўропы»
Ціханоўская таксама сустрэлася з Міністрам замежных справаў Янам Ліпаўскім, прэзідэнтам чэшскага Сенату Мілашам Выстрчылам і спікеркай Парламенту Маркетай Пекаравай Адамавай.
⚪️ Міністра замежных справаў лідарка заклікала разглядзець шляхі вырашэння візавага бану. У прыватнасці: зрабіць выключэнні для спецыяльных групаў, у тым ліку для студэнтаў і сваякоў беларусаў Чэхіі.
🔴 Разам са старшынём Сената Ціханоўская ўсклала кветкі да магілаў лідараў Беларускай Народнай Рэспублікі, а пасля заканчэння цырымоніі абмеркавала з чэшскімі калегамі больш шырокае прызнанне і ўзмацненне легітымнасці Аб’яднанага Пераходнага Кабінета.
⚪️ Са спікеркай парламента абмеркавалі кампанію падтрымкі палітвязняў. Важна адзначыць: рыхтуецца канферэнцыя, якую правядзе Офіс дэмакратычных сілаў Беларусі ў Чэшскай Рэспубліцы і чэшскімі патронамі канферэнцыі. Яна будзе прысвечана беларускім палітзняволеным.
