Падчас працоўнай паездкі ў Жэневу беларуская лідарка сустрэлася з амбасадарамі Батшэбай Нэл Крокер і Мішэль Тэйлар, якія прадстаўляюць ЗША ў міжнародных арганізацыях пры ААН.
Святлана Ціханоўская абмеркавала з дыпламаткамі жахлівыя ўмовы ў беларускіх турмах і крытычную сітуацыю з палітвязнямі ў краіне, а таксама распавяла пра апошнія смерці за кратамі. Лідарка падкрэсліла, што неабходна шукаць спосабы, каб звярнуць увагу міжнароднай супольнасці да гуманітарнага крызісу ў Беларусі.
Таксама бакі абмеркавалі шляхі выканання рашэння Камітэта па правах чалавека ААН аб тэрміновых захадах у дачыненні да Максіма Знака, Віктара Бабарыкі і Сяргея Ціханоўскага. Лідарка адзначыла: гэтае рашэнне дае права ўрадам патрабаваць доступ да палітвязняў, якіх трымаюць інкамунікада.
Асобна Святлана Ціханоўская звярнула ўвагу дыпламатак на неабходнасць рашучых дзеянняў у дачыненні да палітвязняў ад Офіса вярхоўнага камісара па правах чалавека ААН. Лідарка адзначыла, што варта патрабаваць доступ да турмаў, медычную дапамогу, і шукаць шляхі па іх вызваленні праз міжнародныя арганізацыі.
Акрамя таго, Святлана Ціханоўская абмеркавала выкананне рэзалюцыі Міжнароднай арганізацыі працы (ILO) і 33 артыкулу, які быў прыняты ў дачыненні да рэжыму Лукашэнкі ў мінулым годзе. Лідарка падкрэсліла: урадам неабходна прымяніць меры згодна з рэзалюцыяй і ўзняць пытанне Беларусі падчас сесіі МАП. Таксама прагучала прапанова правесці сайд-івэнт па Беларусі.
У межах Рады па правах чалавека беларуская лідарка заклікала дыпламатак падтрымаць рэзалюцыю па Беларусі, якая павінна быць прынятая ў сакавіку. Таксама Ціханоўская адзначыла, што трэба працягнуць два мандаты па Беларусі – экспертнай групы пры ААН, якая будзе займацца зборам доказаў злачынстваў рэжыму, і спецдакладчыка па Беларусі.
Святлана Ціханоўская таксама надала ўвагу важнасці прыцягнення рэжыму і яго памагатых да адказнасці ў Міжнародным крымінальным судзе. Лідарка перадала дакументы і доказы, сабраныя НАУ, якія сведчаць аб здзейсненых злачынствах, а менавіта аб вывазе ўкраінскіх дзяцей і злачынствах супраць чалавечнасці.
Важнай тэмай размовы таксама стала легалізацыя беларусаў за мяжой і магчымыя дзеянні па Беларусі ў Міжнароднай арганізацыі па міграцыі. У прыватнасці, бакі абмеркавалі спосабы сістэмнага вырашэння праблемы легалізацыі, пратэрмінаваных пашпартоў і выдачы пасведчанняў аб нараджэнні. Асобна Святлана Ціханоўская распавяла пра праект новага беларускага пашпарту.
З Мішэль Тэйлар
З Батшэбай Нэл Крокер
