Мерапрыемства адбылося пры ўдзеле студэнтаў, акадэмічнага складу і мясцовай беларускай супольнасці Нью-Ёрка. Сустрэчу адкрыў прафесар юрыдычнага факультэта Нью-Ёркскага ўніверсітэта Рычард Пілдзэс, пасля чаго да прысутных звярнуўся Сяргей Ціханоўскі.
Асноўная частка мерапрыемства прайшла ў фармаце панэльнай дыскусіі, у якой прыняла ўдзел Святлана Ціханоўская. Разам з беларускай лідаркай у дыскусіі ўдзельнічалі прафесар Пілдзэс, юрыстка Ганна Маціеўская і галоўны дарадца Святланы Ціханоўскай Франак Вячорка.
Падчас дыскусіі ўдзельнікі абмеркавалі сітуацыю ў Беларусі, уплыў амерыканскай палітыкі на вызваленне палітвязняў і перспектывы развіцця падзеяў у рэгіёне, а таксама адказалі на пытанні з залі.
Святлана Ціханоўская:
«Надзею мне дае вытрымка і ўстойлівасць беларусаў. Нашыя журналісты, актывісты, абаронцы правоў чалавека — нават у выгнанні, пад пагрозай, амаль без рэсурсаў — працягваюць. Яны змагаюцца не за ўладу, а за права вярнуцца дадому свабоднымі. Мяне натхняюць палітвязні — людзі, якія гады правялі ў адзіночных камерах, прайшлі катаванні і ізаляцыю. І ўсё ж, калі іх вызваляюць, яны глядзяць мне ў вочы і кажуць: «Што я магу зрабіць, каб дапамагчы?» З такімі людзьмі мы не можам прайграць. Іх мужнасць — мая сіла. І я ведаю — калі надыдзе момант, беларусы ўстануць зноў».
