Беларуская лідарка завяршыла візіт у Ісландыю ўдзелам у семінары Паўночнай Рады «Шлях да дэмакратычнай Беларусі». Да імпрэзы далучылася больш за 100 чалавек, сярод якіх – кіраўніцтва Паўночнай Рады, дэпутаты, амбасадары і госці.
Святлана Ціханоўская не толькі выступіла з прамовай, але і далучылася да дыскусіі разам з міністаркай замежных справаў Ісландыі Тордзіс Гільфадоцір і прэзідэнткай Паўночнай Рады Брындзіс Харальдсдоцір.
Асноўны аповед лідаркі быў прысвечаны сітуацыі з палітвязнямі – яна заклікала прыкласці максімальныя намаганні па іх вызваленні: «Вы можаце «ўсынавіць» палітвязняў: існуе праграма шэфства, якой кіруе швейцарска-германская арганізацыя Libereco. Запатрабуйце ад рэжыму Лукашэнкі інфармацыю пра месцазнаходжанне палітвязняў, іх здароўе і ўмовы ўтрымання ў турме. Гэта не зойме шмат часу, але дашле моцны сігнал тым, хто за кратамі».
Акрамя таго Святлана Ціханоўская:
👉🏻 Акцэнтавала ўвагу на важнасці падтрымкі медыя, адукацыі і культурніцкіх арганізацыяў
«Мы можам больш працаваць у галіне культуры, адукацыі і медыя. Падтрымка беларускай культуры і ідэнтычнасці мае найважнейшае значэнне, бо яна мацнейшая за кулі. І ў выпадку з Беларуссю гэта таксама спосаб супрацьстаяць паўзучай акупацыі з боку Расіі».
👉🏻 Выступіла супраць фарміравання «жалезнай заслоны» паміж Беларуссю і Захадам
«Вельмі важна не будаваць новую жалезную заслону паміж Беларуссю і Захадам. Ізалюючы дыктатара, мы павінны падтрымаць беларускае грамадства, развіваць сувязі паміж людзьмі, прасоўваць нацыянальную ідэнтычнасць, культуру і гісторыю – усё тое, што звязвае нас з Еўропай».
👉🏻 Прапанавала пашырыць супрацоўніцтва паміж дэмакратычнымі сіламі Беларусі і Паўночнымі краінамі
«Прапаную наладзіць супрацоўніцтва паміж Паўночнай Радай і дэмакратычнымі сіламі Беларусі, як мы ўжо зрабілі з Еўрапейскім Саюзам і ЗША. Гэты дыялог можа адбывацца як на парламенцкім, так і на ўрадавым узроўні».
