Напачатку 2024 года беларуса Яраслава Новікава затрымалі на мяжы Грузіі з Арменіяй. Рэжым завёў на хлопца крымінальную справу, абвінаваціўшы ва ўхіленні ад службы ў войску — і праз гэта падаў запыт у міждзяржаўны вышук СНД. Маладога чалавека, які з’ехаў з радзімы з-за пагрозы мабілізацыі, змясцілі ў ізалятар — і менавіта там чакаў рашэння па экстрадыцыі. У той жа час юрысты Хельсінкскай асацыяцыі, а таксама прадстаўнікі дэмакратычных сілаў Беларусі пачалі працу над вызваленнем Новікава.
Сёння армянскі бок афіцыйна паведаміў, што Яраслаў атрымаў статус уцекача — і яму больш не пагражае экстрадыцыя. У хуткім часе малады чалавек будзе вызвалены.
Святлана Ціханоўская: «Шчыра вітаю Яраслава і яго блізкіх з такой навіной. Таксама хачу падзякаваць уладам Арменіі за прынятае рашэнне і адкрытасць у камунікацыі. Пытанне Яраслава падымалі і прадстаўнікі дэмакратычных сілаў, і нашыя праваабаронцы, бо для нас першасная задача – абараніць беларусаў і гарантаваць іх бяспеку ў любой краіне.
Спадзяюся, гэтая справа стане пазітыўным прэцэдэнтам – і дапаможа надалей больш аператыўна вырашаць пытанні, звязаныя з бяспекай беларусаў».
