31 студзеня Святлана Ціханоўская прыняла ў Офісе спецпасланнікаў і амбасадараў краінаў Паўночнай і Балтыйскай групы. У сустрэчы бралі ўдзел:
- Грэтэ Сіласен (Данія)
- Герман Інголфсан (Ісландыя)
- Яана Тэкенберг (Фінляндыя)
- Гунта Пасторэ (Латвія)
- Марка Коплімаа (Эстонія)
- Ларс Крыстэнсэн (Нарвегія)
- Аста Андрыяўскене (Літва)
- Анна Казлоўска-Слупэк (Польшча)
- Крысціна Ёханесан (Швецыя)
Асноўныя тэмы абмеркавання:
🔹 Непрызнанне «выбараў» і статус Лукашэнкі
Святлана Ціханоўская падзякавала прадстаўнікам краінаў за рашучыя заявы адносна непрызнання так званых «выбараў» 26 студзеня. Яна адзначыла, што заявы ад Паўночна-Балтыйскіх краінаў былі аднымі з самых моцных і выразных. У Еўрапейскім парламенце, ПАРЕ, АБСЕ, а таксама ў шэрагу міжнародных арганізацыяў былі прынятыя рэзалюцыі, якія асуджаюць гэты фарс.
🔹 Рэпрэсіі і вызваленне палітвязняў
Ціханоўская падкрэсліла, што, нягледзячы на прагнозы некаторых экспертаў пра магчымае змякчэнне рэпрэсіяў, рэжым працягвае палітычныя пераследы. Яна заклікала краіны працягваць намаганні для вызвалення палітвязняў і спынення рэпрэсіяў.
🔹 Стратэгія
Ціханоўская прадставіла планы дэмакратычных сілаў на 2025 год, у тым ліку ў кантэксце магчымых перамоваў па Украіне. Асобна закранутыя пытанні падтрымкі беларускай дыяспары і рэарганізацыі валанцёрскіх сетак у Беларусі.
🔹 Супрацоўніцтва з міжнароднай супольнасцю
Абмяркоўвалася далучэнне новых краінаў да ініцыятывы Літвы ў Міжнародным крымінальным судзе (МКС), а таксама падтрымка праваабаронцаў і Міжнароднага гуманітарнага фонду для дапамогі пацярпелым ад рэпрэсіяў.
🔹 Будучыя міжнародныя ініцыятывы
Ціханоўская паведаміла пра планы ўдзелу ў Касцюшкаўскім форуме разам з Польшчай, а таксама ў Мюнхенскай канферэнцыі па бяспецы, дзе будуць абмяркоўвацца магчымыя кантакты з новай адміністрацыяй ЗША. Акрамя таго, была ўзнятая прапанова правядзення пасяджэння Рады Бяспекі ААН па Беларусі ў фармаце Arria Formula.
🔹 Падтрымка з боку ЕС і фінансаванне
Асобная ўвага была нададзеная пытанню замарожвання фінансавай дапамогі ЗША для незалежных СМІ і грамадзянскай супольнасці. Ціханоўская заклікала партнёрскія краіны разглядзець магчымасць выдзялення фінансавай падтрымкі для медыя.
🔹 Легалізацыя беларусаў
Абмеркавалі сітуацыю з легалізацыяй беларусаў за мяжой, выдачу пашпартоў замежніка, а таксама статус для новых беларускіх пашпартоў.
Ціханоўская выказала падзяку прадстаўнікам краінаў за падтрымку і салідарнасць, падкрэсліўшы, што будучыня Беларусі – гэта таксама пытанне бяспекі ўсяго рэгіёна.
