У сакавіку 2022 г. Рада Еўропы прыняла рашэнне спыніць усе кантакты з рэжымам. У тым жа рашэнні ўтрымлівалася ўказанне органам Рады Еўропы паглыбіць адносіны з беларускімі дэмакратычнымі сіламі і грамадзянскай супольнасцю з фокусам на такія тэмы, як абарона правоў чалавека, незалежныя СМІ і моладзь. У верасні 2022 г. было прынятае рашэнне пра стварэнне Кантактнай групы Рады Еўропы па адносінах з Беларуссю.
1. Што такое «Кантактная група Рады Еўропы па адносінах з Беларуссю»? Для чаго яна створаная?
Кантактная група створаная рашэннем Рады Еўропы для супрацоўніцтва з Беларуссю, якая прадстаўленая дэмакратычнымі сіламі і грамадзянскай супольнасцю.
2. Якія задачы вырашае Кантактная група?
Задачамі Кантактнай групы з'яўляюцца каардынацыя і забеспячэнне ўзаемадзеяння Рады Еўропы з дэмакратычнымі сіламі і грамадзянскай супольнасцю Беларусі, а таксама распрацоўка, падрыхтоўка і рэалізацыя праграмаў і праектаў для падтрымкі развіцця дэмакратычных інстытутаў і грамадзянскай супольнасці Беларусі.
3. Якія паўнамоцтвы ёсць у Кантактнай групы? На падставе якіх дакументаў яна дзейнічае?
Кантактная група створаная Генеральным Сакратаром Рады Еўропы на падставе рашэння Камітэта міністраў Рады Еўропы ад 7 верасня 2022г. З рашэннем можна азнаёміцца па гэтай спасылцы.
4. Які фармат працы ў Кантактнай групы? Якая рэгулярнасць сустрэчаў Кантактнай групы?
Кантактная група плануе рэгулярна збірацца для кансультацый. На сённяшні дзень адбылася адна сустрэча – 7 лістапада.
5. Які склад Кантактнай групы? Хто туды ўваходзіць? Ці можа гэты склад мяняцца?
У склад кантактнай групы ўваходзяць прадстаўнікі падраздзелаў Рады Еўропы, дэмакратычных сілаў (ОСЦ, АПК, КР), грамадзянскай супольнасці (БХК, «Вясна», Рада, БАЖ, ByNGO) і супольнасцяў (Бацькаўшчына – па пытаннях культуры і дыяспараў, феміністычная супольнасць, уключаючы фемгрупу КР – па пытаннях гендарнай роўнасці) Беларусі.
- Склад Кантактнай групы:
Дэмакратычныя сілы і супольнасці:
– Аляксандр Шлык, спецыяльны прадстаўнік Святланы Ціханоўскай па выбарах;
– Уладзімір Астапенка, Аб'яднаны Пераходны Кабінет Беларусі;
– Таццяна Марыніч, Каардынацыйная Рада;
– Юлія Міцкевіч, феміністычная супольнасць;
– Бацькаўшчына, арганізацыя, якая працуе з дыяспарамі і беларускай культурай.
Грамадзянская супольнасць
– Алег Гулак, Беларускі Хельсінкскі Камітэт;
– Павел Сапелка, Праваабарончы цэнтр «Вясна»;
– Алег Агееў, Беларуская асацыяцыя журналістаў;
– Маргарыта Варыхава, Рада: Беларуская нацыянальная рада моладзі;
– Партнёрства арганізацый грамадзянскай супольнасці ByNGO.
Тэматычныя напрамкі шмат у чым абумоўленыя прыярытэтамі, вызначанымі камітэтам міністраў Рады Еўропы ў рашэнні ад 16 Сакавіка 2022 г.
Да працы будуць прыцягвацца дадатковыя эксперты.
6. Хто прымае рашэнні пра склад Кантактнай групы?
Запрашэнні для ўдзелу ў працы Кантактнай групы накіроўвае Генеральны Сакратар Рады Еўропы. Прадстаўнікі ад Беларусі былі вызначаныя Святланай Ціханоўскай адносна дэмакратычных сілаў і грамадзянскай супольнасцю Беларусі шляхам кансультацый у сектарах грамадзянскай супольнасці.
7. Як можна атрымаць інфармацыю пра вынікі працы Кантактнай групы? Дзе яны будуць друкавацца?
Кантактная група будзе інфармаваць грамадскасць пра сваю дзейнасць, у тым ліку праз СМІ.
8. Што такое Action Plan, які распрацоўвае Кантактная група? Якія тэмы і пытанні ўваходзяць у Action Plan?
Action Plan – дакумент, які прадугледжвае ажыццявіць тэматычныя прыярытэты для супрацоўніцтва ў канкрэтныя праграмы і праекты, стварыць план іх рэалізацыі.
9. Якія формы ўзаемадзеяння Кантактнай групы з грамадзянскай супольнасцю і дэмакратычнымі актарамі прадугледжаныя?
Прадбачацца кансультацыі, як у анлайн так і ў афлайн фарматах. У дадзены момант вядзецца збор прапановаў і ідэй для супрацоўніцтва з Радай Еўропы: https://cutt.ly/A12wWJ2.
10. Як грамадзянская супольнасць можа ўплываць на змест Action Plan?
У дадзены момант вядзецца збор прапановаў і ідэй для супрацоўніцтва з Радай Еўропы: https://cutt.ly/A12wWJ2. Гэта і стане асновай для распрацоўкі Action Plan.
11. Ці прадугледжваюцца якія-небудзь формы кансультацый з арганізацыяй грамадзянскай супольнасці з нагоды Action Plan?
Так, вядома.
