На палях стакгольмскай канферэнцыі па Беларусі адбылася закрытая панэльная дыскусія з удзелам дыпламатаў, чыноўнікаў і палітыкаў з краін Еўрасаюзу і ЗША. Арганізатарамі выступілі міжурадавая арганізацыя International IDEA і амбасада Літвы ў Швецыі, якую ўзначальвае былы міністр замежных спраў і амбасадар Літвы ў Беларусі Лінас Лінкявічус.
«Адных санкцый недастаткова, каб змяніць рэжым. Змены могуць адбыцца толькі знутры, і толькі дзякуючы беларусам. Гэта часта забываецца палітыкамі. Таму вельмі важна заўсёды сумяшчаць санкцыі з дапамогай людзям» – адзначыла Ціханоўская.
Паводле Ціханоўскай, дапамога павінна быць накіраваная на беларускія незалежныя СМІ, грамадзянскую супольнасць, сем’і рэпрэсаваных, прафсаюзы, праваабаронцаў і інстытуты дэмакратычных сілаў.
Ціханоўская заклікала фармалізаваць адносіны з дэмакратычнымі сіламі. «Мы просім фармалізаваць адносіны з беларускімі дэмакратычнымі сіламі, прызначыць спецыяльных пасланнікаў і ўстрымацца ад уручэння даверчых грамат нелегітымнаму Лукашэнку. Падтрымайце адкрыццё нашых місіяў у вашых сталіцах і стварыце групу для свабоднай Беларусі ў парламентах, як гэта было зроблена тут, у Рыксдагу» – падкрэсліла Ціханоўская.
