Святлана Ціханоўская чацвёрты год запар бярэ ўдзел у штогадовым Сусветным эканамічным форуме ў Давосе, які штогод збірае дзясяткі кіраўнікоў дзяржаваў і ўрадаў, сотні міністраў, кіраўнікоў міжнародных арганізацыяў, а таксама лідараў найбуйнейшых кампаніяў і грамадзянскай супольнасці.
На палях форуму Ціханоўская сустрэлася з шэрагам палітычных і грамадскіх лідараў:
🇱🇹 Гітанасам Наўседам — прэзідэнтам Літвы;
🇨🇦 Анітай Ананд — міністаркай замежных справаў Канады;
🇨🇦 Мелані Жалі — міністаркай прамысловасці Канады;
🇬🇧 Борысам Джонсанам — былым прэм’ер-міністрам Вялікабрытаніі;
🇨🇿 Андрэем Бабішам — прэм’ер-міністрам Чэшскай Рэспублікі;
🇲🇩 Аляксандру Мунцянам — прэм’ер-міністрам Малдовы;
🇺🇳 Аналенай Бербак — прэзідэнткай Генеральнай асамблеі ААН;
🌍 Маркам Рутэ — генеральным сакратаром НАТА;
🌍 Аньес Каламар — генеральнай сакратаркай Amnesty International;
💼 Рут Порат — прэзідэнткай і галоўнай інвестыцыйнай дырэктаркай Google;
💼 Сымонам Мідэрам — генеральным дырэктарам PKO Bank Polski;
Акрамя таго, беларуская лідарка прыняла ўдзел у шэрагу публічных мерапрыемстваў у межах Сусветнага эканамічнага форуму. У тым ліку — у дыскусіі «Ці здольная Расія ўтрымліваць эканоміку ва ўмовах вайны?», круглым стале IGWEL «Новая эпоха геапалітычнай нявызначанасці», а таксама ў панэлі на тэму «Дэмакратыя ў выгнанні: лідарства ў барацьбе Беларусі за свабоду».
Святлана Ціханоўская:
«Давос — яшчэ адна магчымасць распавесці пра Беларусь сусветным лідарам. Нагадаць пра тых, хто сёння знаходзіцца за кратамі за сваё права жыць у свабоднай краіне. Для нас прынцыпова, каб Беларусь заставалася ў міжнародным парадку дня, каб свет не прывыкаў да рэпрэсіяў і несправядлівасці. Менавіта праз такія сустрэчы мы ўмацоўваем міжнародную салідарнасць з беларускім народам і працягваем супольную працу дзеля вызвалення палітвязняў і дэмакратычнай будучыні Беларусі».
