Сёння Апеляцыйны суд Бялграда адмяніў раней прынятае рашэнне аб экстрадыцыі рэжысёра і актывіста Андрэя Гнёта ў Рэспубліку Беларусь і накіраваў справу на новы разгляд у Вышэйшы адміністрацыйны суд Бялграда. Адмяняючы раней прынятае рашэнне, суд апеляцыйнай інстанцыі адзначыў, што не ўсе абставіны гэтай справы былі разгледжаныя належным чынам. Таксама было ўстаноўленае парушэнне права на абарону Андрэя Гнёта паўстаць перад судом і даваць тлумачэнні асабіста. Наступнае слуханне па справе ў судзе першай інстанцыі прызначанае на 26 сакавіка.
Разам з адменай рашэння суда першай інстанцыі суд працягнуў тэрмін утрымання Андрэя пад вартай яшчэ на 60 дзён. Гэта не значыць, што ён правядзе ўвесь тэрмін у турме: у выпадку прыняцця рашэння на карысць Андрэя, ён будзе вызвалены з-пад варты.
З улікам таго, што Цэнтральнае бюро Інтэрпола заблакавала доступ да прафайла Андрэя, дарадца Святланы Ціханоўскай па прававых пытаннях Крысціна Рыхтэр спадзяецца на станоўчы вынік справы: «Я выказваю вялікую ўдзячнасць дыпламатычнаму корпусу краінаў Еўрапейскага Саюза, які знаходзіцца ў Бялградзе. Амбасадары некалькіх дзяржаваў вельмі аператыўна адгукнуліся на просьбу нашых юрыстаў аб дапамозе – і арганізавалі як перамовы на дыпламатычным узроўні, так і прысутнасць на разглядзе справы ў судзе апеляцыйнай інстанцыі, тым самым выказаўшы сваю салідарнасць з Андрэем».
Юрыдычная каманда Офіса працягне пільна сачыць за лёсам справы Андрэя і весці пастаянную камунікацыю з адвакатамі і дыпламатычным корпусам.
Мы заклікаем беларусаў таксама падтрымаць Андрэя лістамі. Адрас для лістоў падтрымкі: Andrey Gnyot, Centralni zatvor, Bačvanska 14, 11050 Beograd (Voždovac).
