У жніўні падчас сустрэчы з Ціханоўскай у Осла кіраўніцтва Yara заявіла, што перагледзіць сваё супрацоўніцтва з Беларуськаліем і да снежня прыме рашэнне пра далейшую прысутнасць у Беларусі. Учора, 17 снежня, Святлана Ціханоўская правяла тэлефанаванне з CEO Yara Свейнам Торэ Халзетэр, каб абмеркаваць, якія далейшыя дзеянні кампаніі ў Беларусі.
На тэлефанаванні Ціханоўская:
– распавяла пра тое, што рэпрэсіі ў Беларусі не зніжаюцца – на гэтым тыдні былі агучаныя суровыя прысуды па справе Ціханоўскага, Эдуарду Пальчысу, працягваюцца затрыманні прадстаўнікоў «Рабочага Руху» і ціск на супрацоўнікаў Беларуськалія;
– падзялілася новым расследаваннем, якое даказвае прамы ўдзел менеджменту Беларуськалія ў фальсіфікацыі выбараў у Беларусі на працягу многіх гадоў, што з'яўляецца парушэннем крымінальнага кодэкса. У 2020 годзе фальсіфікацыі прывялі да крызісу ў краіне;
– заявіла, што беларусы лічаць непрымальным супрацоўніцтва з рэжымам. Тую ж пазіцыю выказалі ЕС і ЗША, калі ў фармаце санкцыйнага ціску пазначылі, што калійная сфера ў Беларусі мае непасрэднае дачыненне да фінансавання нелегальнага рэжыму.
– падкрэсліла: беларусы хацелі б бачыць Yara як доўгачасовага, сумленнага партнёра ў будучыні, але зараз неабходна замарозіць супрацоўніцтва з беларускімі дзяржаўнымі прадпрыемствамі.
– адзначыла, што 32 кампаніі (сярод якіх British American Tobacco, Rolls Royce, Scandia Steel, Becker Group, Hansen & Rosenthal), спынілі супрацоўніцтва з рэжымам і дзяржпрадпрыемствамі Беларусі. Ужо ёсць намер сумесна з такімі кампаніямі распрацаваць план для новай Беларусі – пасля пераменаў у нашай краіне будуць вітаць замежныя інвестыцыі.
– патлумачыла, што Офіс Ціханоўскай працуе з міжнароднымі прафсаюзамі, МЗС Нарвегіі, а таксама на сустрэчах з кіраўніцтвам Еўракамісіі і Дзярждэпам ЗША ўздымае пытанне пра карупцыйныя схемы рэжыму і сыход ад санкцый ЕС і ЗША.
СЕА Yara Халзетэр, у сваю чаргу, казаў пра забеспячэнне бяспечных умоў працы на беларускім прадпрыемстве. На жаль, на Беларуськаліі працягваюцца аварыі, у тым ліку, са смяротным зыходам. У гэтым годзе каманда Yara наведвала Беларуськалій з мэтай ацаніць прамысловую і карпаратыўную бяспеку. Таксама кіраўніцтва Yara азнаёміцца з расследаваннем наконт фальсіфікацый выбараў з боку супрацоўнікаў Беларуськалія. Халзетэр заявіў, што лепш рабіць любыя магчымыя крокі па паляпшэнні сітуацыі з бяспекай працы, чым сыходзіць з Беларусі і не мець уплыву.
«Беларусы лічаць неэтычным такія паводзіны – пошук шчылін у санкцыях ЕС і ЗША. Гэта ўжо моцна паўплывала на рэпутацыю Yara ў Беларусі. Я ўжо казала пра гэта на тэлефанаванні з кіраўніком МЗС Нарвегіі і сустрэла разуменне міністаркі Хюітфельд. Мы працягнем уздымаць пытанне спынення супрацоўніцтва Yara з рэжымнымі кампаніямі зноў і зноў. Бо гэта пазіцыя беларусаў, а я раблю гэта дзеля іх», – заявіла ў канцы тэлефанавання Ціханоўская.
