Сёння ўжо трэці дзень працоўнага візіту Ціханоўскай у Францыю. Вось вынікі ўчорашняга дня

Святлана Ціханоўская ў Парыжы сустрэлася з прэзідэнтам Нацыянальнай асамблеі Францыі Рышарам Феранам, старшынёй камітэта па еўрапейскіх справах Нацыянальнай асамблеі Сабін Ціле, амбасадарам ЗША ў Францыі і супрацоўнікамі амбасады, дэпутатам парламента П'ерам-Аляксандрам Англадэ, кіраўніком камісіі па міжнародных справах Жанам-Луі Бурланжам, кіраўніком канферэнцыі  прэзідэнтаў універсітэтаў Мануэлем Тунанам дэ Лара.

Што абмяркоўвалі на сустрэчах:

– Працягнуць палітыку непрызнання. Ціханоўская прапанавала парламентам сяброўскіх краін заняць выразную пазіцыю па непрызнанні рэжыму ў Беларусі.

– Адправіць праект Канстытуцыі, напісанай камандай прадстаўніка па канстытуцыйнай рэформе Анатоля Лябедзькі, у Венецыянскую камісію на ацэнку.

– Разглядзець магчымасць пачатку міжнароднага расследавання супраць рэжыму ў міжнародным крымінальным судзе і міжнародным судзе ААН.

– Падтрымаць адвакатаў і юрыстаў, якія страцілі магчымасць прафесійнай практыкі ў Беларусі.

– Бязвізавы рэжым для беларусаў.

– Узмацненне ціску на ўсіх, хто дапамагае рэжыму. У прыватнасці, Францыя можа разглядзець забарону на імпарт азотных угнаенняў і драўнянай прадукцыі, што з'яўляецца асноўнымі гандлёвымі пазіцыямі з Францыяй.

– Запусціць праграму стыпендыяльнай падтрымкі рэпрэсаваных студэнтаў для навучання на бакалаўраў, у магістратуры і дактарантуры.

– Падтрымаць дзеячаў культуры, стварэнне культурных рэзідэнцый і праграм рэабілітацыі.

– Падымаць пытанне Беларусі ў парламенцкіх асамблеях АБСЕ і Рады Еўропы, Рады Бяспекі ААН і Генасамблеі ААН.

Таксама каманда Ціханоўскай абмеркавала з прадстаўнікамі Турцыі і Ватыкана магчымы візіт у іх краіны.

17 верасня 2021 в 13:56