«Мы працягваем працу па інцыдэнце з захопам самалёта. Да Рамана Пратасевічу і Сафіі Сапега да гэтага часу не пускаюць адвакатаў. Гэта значыць, што мы да гэтага часу не ведаем, у якіх умовах знаходзяцца закладнікі і як з імі абыходзяцца. Але мы бачылі ролікі, якія запісваюць з імі пад прымусам. Учора мы, беларусы, пахавалі Вітольда Ашурка. За дзень да гэтага мы ўсе ўбачылі відэа яго гібелі ў засценках турмы, змантаванае сілавікамі, – і яно не дадае ўпэўненасці, што яго смерць не была гвалтоўнай. Учора таксама стала вядома пра самагубства 17-гадовага сіраты Дзмітрыя Стахоўскага, які не вытрымаў ціску і крымінальнага пераследу – і скончыў жыццё самагубствам.
Увесь гэты гвалт, беззаконне і ўсе гэтыя смерці – вынік таго, што Лукашэнка трымае ўладу незаконна і адчувае сябе беспакарана. Таму за апошнія два дні мы правялі экстраную сустрэчу лідараў дэмакратычных сіл. На ёй мы ўзгаднілі прынцыпы агульнай стратэгіі: ціск на рэжым, узмацненне і падтрымка структур грамадзянскай супольнасці, праца над праектам Канстытуцыі. І дамовіліся працаваць як частка адзінага руху: заклікаць прызнаць рэжым тэрарыстычным і прыцягнуць да адказнасці ўсіх вінаватых. Мы разам падтрымліваем ініцыятывы, накіраваныя на эканамічны байкот рэжыму і негвалтоўны супраціў. Мы адзінай камандай абараняем незалежнасць нашай краіны, дапамагаем узятым у закладнікі і дамагаемся, каб Беларусь была прыярытэтам у ЕС, ЗША АБСЕ і Радзе бяспекі ААН. І я падтрымліваю прапанову прэзідэнта Францыі Эмануэля Макрона запрасіць дэмакратычныя сілы на праграму саміту Вялікай сямёркі.
Таксама мы настойваем на правядзенні расследавання па факце захопу борта ў прыватнасці і злачынстваў Лукашэнкі ў цэлым. Я правяла тэлефанаванне са старшынём нямецкай партыі Хрысціянска-дэмакратычны саюз Армінам Лашэтам пра рэакцыю і дзеянні Германіі. І я ўдзячная, што генеральны пракурор ФРГ распарадзіўся ўзяць пад асабісты кантроль – як ён гэта назваў – «разгул гвалту ў Беларусі».
Заўтра я сустрэнуся з прэм'ер-міністрам Нідэрландаў Маркам Рутэ ў Гаазе, а ў панядзелак 31 траўня – з прэзідэнткай Эстоніі Керсці Кальюлайд у Таліне.
Мы бачым, што міжнародная супольнасьць працягвае ўводзіць меры, каб абараніць грамадзян сваіх краін ад праяў дзяржаўнага тэрарызму з боку рэжыму, а таксама падтрымаць Рамана і Сафію і ўсіх беларусаў. Учора я выступіла ў камітэце па замежных справах Еўрапарламента і агучыла нашую агульную пазіцыю: адмовіць у якой-небудзь фінансавай падтрымцы рэжыму, увесці санкцыі, даць зразумець Расіі і іншым дзяржавам, што любыя пагадненні або кантракты, падпісаныя з рэжымам, будуць перагледжаныя або ануляваныя. І, вядома, я заклікала ўзмацніць падтрымку самім беларусам.
Я разумею рашэнні ЕС пра закрыццё авіяпалётаў над Беларуссю, бо гэта пытанне бяспекі ўсіх еўрапейцаў. Але мы патрабуем адкрыць наземныя межы Беларусі для вольнага перамяшчэння беларускіх грамадзян, таму што нельга дазволіць рэжыму ператварыць нашую краіну ў турму на 9 мільёнаў чалавек.
Мы абвясцілі 29 траўня – дату затрымання Сяргея Ціханоўскага – днём салідарнасці. У гэты дзень па ўсім свеце пройдзе Глабальны пікет салідарнасці з Беларуссю – у ім возьмуць удзел палітыкі, жыхары розных краін і дыяспара. Але галоўнае – каб у гэты дзень беларусы ўнутры краіны падтрымалі адно аднаго ўсімі магчымымі спосабамі: вулічнымі акцыямі, сімваламі, лістамі палітвязням.
Таксама ўчора я абвясціла Міжнародную канферэнцыю пра новыя выбары ў Беларусі, якая пройдзе 1-2 чэрвеня. У ёй прымуць удзел мой спецпрадстаўнік па выбарах Аляксандр Шлык, кіраўнік Народнага антыкрызіснага кіравання Павел Латушка, чалец прэзідыума Каардынацыйнай рады Вольга Кавалькова і іншыя прадстаўнікі дэмакратычных сіл і грамадзянскай супольнасці. Таксама ў ёй удзельнічаюць прадстаўнікі Еўрапарламента, Парламенцкай Асамблеі АБСЕ, Кангрэсу ЗША, ЦВК розных краін. Мы запрасілі і прадстаўнікоў рэжыму – бо дыялог пра новыя выбары зараз у інтарэсах усіх жыхароў Беларусі».
