Ціханоўская 20 ліпеня сустрэлася з дзвюхпартыйнай групай сенатараў ЗША. З кіраўніком камітэта Сената ЗША па міжнародных адносінах Робертам Менендэсам і яго камандай яна абмеркавала, як скаардынаваць падтрымку Беларусі паміж ЗША і ЕС. Менендэс прымаў Ціханоўскую ў зале, дзе традыцыйна праходзяць прыёмы лідараў дзяржаў.
Таксама Ціханоўская сустрэлася з шырокай групай сенатараў. Сенатар Дэн Саліван звяртаўся да Святланы Ціханоўскай «спадарыня прэзідэнт» і выказваў падтрымку ўсім беларусам у яе асобе.
Сенатары на сустрэчах цікавіліся цяперашняй сітуацыяй у Беларусі. Ціханоўская казала пра рэпрэсіі з боку рэжыму і пра ўзаемападтрымку беларусаў. Яна распавяла, як ужо амаль год людзі ў Беларусі праводзяць акцыі пратэсту, што нават насуперак жудаснаму ціску актывісты выносяць на вуліцы сцягі, распаўсюджваюць улёткі, ствараюць ініцыятывы, каб дапамагаць адно аднаму з адвакатамі, перадачамі зняволеным, пошукам працы.
Святлана Ціханоўская падзякавала сенатарам за тое, што абедзве партыі адзіныя ў падтрымцы беларусаў, і заклікала іх узмацняць ціск – на рэжым, а дапамогу – для народа Беларусі.
