Завяршыўся першы дзень афіцыйнага візіту Святланы Ціханоўскай у Латвію. Святлана Ціханоўская прыехала ў Рыгу па запрашэнні міністра замежных спраў Латвіі Эдгарса Рынкевічса і парламента Латвіі.
Дзень пачаўся з вывешвання нацыянальнага беларускага бела-чырвона-белага сцяга над гарадской ратушай у Рызе разам з мэрам Марціньшам Стакісам.
Ціханоўская сустрэлася з мэрам і яго камандай, а таксама з дэпутатамі гарадской Рады. Яны правялі перамовы і дамовіліся пра правядзенне шэрагу культурных мерапрыемстваў, выставаў і літаратурных чытанняў, прысвечаных Беларусі. Ціханоўская прапанавала стварыць у Рызе культурную прастору, дзе зможа збірацца беларуская дыяспара, каб праводзіць культурныя мерапрыемствы. Абмяркоўвалі магчымасць стажыроўкі для маладых беларусаў у гарадской Радзе і ў офісах дэпутатаў, каб навучыцца мясцоваму самакіраванню.
Святлана Ціханоўская наведала ўкраінскі цэнтр, дзе адбываецца размеркаванне гуманітарнай дапамогі для ўцекачоў. Там яна пазнаёмілася з украінцамі, якія толькі нядаўна пераехалі ў Латвію. Ціханоўскай паказалі, як Латвія прымае і дапамагае ўкраінскім уцекачам. Сярод уцекачоў было шмат беларусаў, якім з-за вайны давялося пакінуць Украіну.
Пасля гэтага Ціханоўская накіравалася ў МЗС, дзе правяла перамовы з Эдгарсам Рынкевічсам. Яны казалі пра калійную ўгоду і пра тое, як яе спыніць. Ціханоўская сказала, што «без вызвалення палітычных зняволеных і спынення рэпрэсій здымаць санкцыі нельга. Гэта прывядзе да яшчэ большай беспакаранасці рэжыму». Святлана Ціханоўская папрасіла Латвію працягнуць падтрымку незалежных медыяў, праграмаў адукацыі для журналістаў, журналістаў-расследавальнікаў, а таксама працягваць праграмы рэабілітацыі – у 2020 годзе па іх ездзілі параненыя на пратэстах. Зараз Ціханоўская прапанавала прымаць на праграму былых палітычных зняволеных, якія пачынаюць выходзіць з турмаў.
Далей Ціханоўская накіравалася ў парламент Латвіі. Спікерка парламента Інара Мурніецэ праінфармавала пра стварэнне парламенцкай групы «Сяброў Беларусі». Такія групы існуюць ужо ў двух дзясятках парламентаў па ўсім свеце. У латвійскую групу ўвайшлі 20 дэпутатаў – гэта 20% усіх дэпутатаў у парламенце Латвіі і колькасць гэтых дэпутатаў расце. Група «Сяброў Беларусі» будзе ўздымаць пытанні дапамогі беларусам у Латвіі. Дамовіліся пра супрацоўніцтва ў галіне заканадаўства і кансультацыі па праектах рэформаў у Беларусі. Парламент Латвіі гатовы аказваць такую кансультацыйную падтрымку.
Пазней Ціханоўская адправілася ў офіс прэм'ер-міністра Карыньша Крыш'яніса, дзе размова ішла пра наступную Раду ЕС, якая пройдзе праз два тыдні. Ціханоўская заклікала прэм'ер-міністра трымаць Беларусь на парадку дня ЕС, паколькі беларусам важна адчуваць падтрымку і ведаць, што яны не забытыя. Яна прапанавала прэм'ер-міністру падчас Саміта ўзняць пытанне фармату адносінаў паміж Беларуссю і ЕС цяпер і ў будучыні.
Ціханоўская таксама наведала музей акупацыі, дзе расказваюць пра савецкі перыяд у гісторыі Латвіі. Адным з экскурсаводаў быў адзін са стваральнікаў і кіраўнікоў Латвійскага Народнага Фронту, які расказваў пра тое, як адбывалася барацьба ў латышоў за сваю незалежнасць. Ён запэўніў Ціханоўскую, што перамога беларусаў адназначная і непазбежная.
Напрыканцы дня Святлана Ціханоўская сустрэлася з беларусамі Латвіі і выступіла на канцэрце «Вольнага Хору».
У гонар прыезду Святланы Ціханоўскай па Рызе развесілі нацыянальныя беларускія сцягі, а многія медыя, ТВ-каналы і радыё прысвяцілі гэтаму візіту першыя палосы навінаў і першыя хвіліны эфіраў.
Заўтра Ціханоўская выступіць перад пленарным пасяджэннем парламента Латвіі са зваротам і правядзе сустрэчу з прэзідэнтам Латвіі Эгілсам Левітсам.
