На форуме Ціханоўская, яе эканамічная каманда і беларускія эканамісты абмяркоўвалі з прадстаўнікамі краін, банкаў і арганізацый, як дапамагчы Беларусі выйсці з крызісу з найменшымі шокамі і правесці неабходныя рэформы.
- Чаму трэба рыхтаваць эканамічныя рэформы ўжо зараз?
Аляхновіч: «Вакно магчымасцяў, якое з'явіцца ў Беларусі пасля пераменаў, будзе адносна кароткім, паўгода-год. У гэты час дэмакратычныя сілы будуць аб'яднаныя, народ будзе падтрымліваць іх – і ў гэты перыяд трэба паспець правесці рэформы.
Да прыкладу, была сустрэча з віцэ-прэзідэнткай Еўрапейскага інвестыцыйнага банка Тэрэзай Чарвінскай – ужо цяпер мы рыхтуем розныя праекты, каб адразу пасля заканчэння крызісу мы маглі абнавіць эканоміку, каб былі інвестыцыі ў развіццё шляхоў, дарог, будаўніцтва новых і мадэрнізацыю старых бальніц. Візіты і сустрэчы Ціханоўскай патрэбныя для таго, каб падрыхтавацца да прыходу пераменаў».
