Святлана Ціханоўская распавяла пра апошнюю хвалю рэпрэсій супраць беларускіх працоўных, адзначыла пастаянныя парушэнні іх правоў, а таксама пра суды, якія адбываліся апошнія месяцы над прафсаюзнымі лідарамі.
Кіраўнік МАП запэўніў Ціханоўскую, што арганізацыя пад яго кіраўніцтвам будзе трымаць Беларусь у фокусе і настойваць на спыненні рэпрэсій супраць працоўных і вызваленні ўсіх зняволеных прадстаўнікоў рабочага руху. Яны абмеркавалі апошнія прысуды лідарам незалежных прафсаюзаў, у тым ліку справу Аляксандра Ярашука, які таксама з'яўляецца чальцом кіроўнай рады МАП.
Святлана Ціханоўская прывітала рашэнне прымяніць артыкул 33 Статуту МАП у дачыненні да Беларусі, і выказала спадзяванне, што гэта хоць і крайняя мера, але яна дапаможа вызваліць працоўных і прафсаюзных лідараў з турмаў. Ціханоўская запэўніла, што ў найбліжэйшы час дэмакратычныя сілы прадставяць у МАП прапановы па рэалізацыі 33-га артыкулу, які ўжываецца ў дачыненні да краінаў, якія сістэматычна не выконваюць патрабаванні і рэкамендацыі МАП.
Жыльбер Унгбо замяніў на пасадзе кіраўніка МАП Гая Райдэра, які кіраваў арганізацыяй амаль 10 гадоў. МАП з’яўлецца структурай ААН і мае 187 дзяржаваў-сябраў. Удзел у кіраванні МАП бяруць прадстаўнікі працадаўцаў, прафсаюзаў і ўрадаў.