Беларуская лідарка ўзяла ўдзел у пасяджэнні Камітэта міністраў Рады Еўропы ў Страсбургу. Святлана Ціханоўская выступіла з прамовай, а пасля адказала на пытанні. Зварот яна прысвяціла няспынным рэпрэсіям у краіне, прававому хаосу і ўсебаковай ізаляцыі, да якой рэжым прывёў Беларусь.
«У беларусаў не было магчымасці бараніць правы ў міжнародных судах. Не было магчымасці развіваць чалавечы капітал, ствараць партнёрствы і альянсы. І мы бачым вынік: Беларусь – адна з самых бедных краінаў Еўропы. Дзяржаўныя і сацыяльныя інстытуты разбураныя. Людзі жывуць ва ўмовах тэрору. Суверэнітэт знаходзіцца пад пагрозай», – падкрэсліла лідарка.
Каб дэмакратычным сілам больш эфектыўна ўплываць на сітуацыю ў Беларусі, Ціханоўская прапанавала ўдасканаліць план сумесных дзеянняў:
📌 працягнуць навучанне беларускіх юрыстаў;
📌 падтрымаць моладзевыя арганізацыі, каб яны маглі дагрукацца да аднагодкаў унутры краіны;
📌 удасканаліць камунікацыю аб Радзе Еўропы, каб прасоўваць у беларускім асяроддзі ідэі дэмакратычнай будучыні.
Галоўным запытам Ціханоўскай стала распрацоўка дарожнай карты ўступлення Беларусі ў Раду Еўропы. Лідарка бачыць гэты крок пераломным на шляху стварэння дэмакратычнай будучыні Беларусі.
«Калі прыйдзе час, дэмакратычная Беларусь будзе грукацца ў дзверы Еўропы. Мы хочам ведаць, што гэтыя дзверы адчыняцца хутка. Так мы зможам забяспечыць устойлівы і канчатковы пераход Беларусі да дэмакратыі. У інтарэсах еўрапейскай сям’і – прадказальная і дэмакратычная Беларусь», – адзначыла Ціханоўская.
Пасля прамовы беларускай лідаркі адбыліся дэбаты, у якіх удзельнічалі больш за 20 дэлегацыяў. Падчас дэбатаў уздымаліся пытанні, датычныя бягучай сітуацыі з палітвязнямі ў краіне і магчымых шляхоў іх вызвалення. З асобнай увагай быў абмеркаваны ціск на рэжым і прыцягненне яго да адказнасці за выкраданне ўкраінскіх дзяцей. Акрамя таго, дэлегацыі абмеркавалі падтрымку беларускіх незалежных медыя і культурных ініцыятываў, а таксама ўдзел дэмакратычнай Беларусі на міжнароднай арэне.
У прадстаўніцтве Ірландыі ў Радзе Еўропы Святлана Ціханоўская ўрачыста ўручыла Крыж Добрасуседства генеральнай сакратарцы Марыі Пейчынавіч-Бурыч. Па яе ініцыятыве была створана Кантактная група паміж Радай Еўропы і дэмакратычнай Беларуссю. Група працуе паўтары гады і рэалізавала шэраг праектаў, накіраваных на падтрымку незалежных журналістаў, юрыстаў і беларускай моладзі.
Раней Крыж Добрасуседства атрымалі прэзідэнт Польшчы Анджэй Дуда і міністр замежных справаў Радаслаў Сікорскі, міністр замежных справаў Швецыі Тобіяс Більстром, прэзідэнтка Еўрапарламента Раберта Метсола, міністарка замежных справаў Ісландыі Тордзіс Гільфадоцір.
