Нядаўна міністр эканамічнага развіцця Расіі заявіў: рыхтуецца новы інтэграцыйны пакет з Беларуссю на 2024–2026 гады. Аналітыкі лічаць, што ўжо ў 2024-м дыктатары падпішуць гэтыя дамовы. Змест дакументаў не вядомы.
Святлана Ціханоўская: «Рэжым гадамі ўпэўніваў нас, што важна жыць у ладзе з усімі суседзямі. Але што адбываецца на практыцы? Лукашэнка разбурае адносіны з Еўропай – падтрымлівае агрэсара ў вайне, наўмысна стварае міграцыйны крызіс і запалохвае заходніх суседзяў ядзернай зброяй. А залежнасць нашай краіны ад Расіі толькі расце. Кожны пакет інтэграцыі, дэталі якіх хаваюцца ад людзей, адбірае ў Беларусі частку суверэнітэту, бо гэта лукашэнкаўская плата за магчымасць утрымліваць уладу. Але насамрэч за гэты прывілей для рэжыму плаціць народ.
Беларусы расплачваюцца за збліжэнне з Расіяй зніжэннем камфорту і бяспекі, эканамічнай нестабільнасцю і ізаляванасцю ад цывілізаванага свету. «Расія – гэта вайна і галеча», – менавіта такія словы беларусы пісалі на плакатах падчас пратэстаў супраць інтэграцыі яшчэ ў 2019-м. Бо мы хочам жыць у незалежнай краіне, краіне сацыяльнага і эканамічнага дабрабыту. А сапраўдны дабрабыт – гэта не прадавацца па кавалках суседняй краіне, а весці палітыку ў нацыянальных інтарэсах народу, адкрываць новыя магчымасці, прыводзіць у эканоміку міжнародныя інвестыцыі і мець партнёраў па ўсім свеце.
Менавіта таму дэмакратычныя сілы ўжо зараз рыхтуюць практычныя крокі па рэфармаванні Беларусі. Мы бачым сябе часткай Еўропы. Сёння мы пачынаем Стратэгічны дыялог «Беларусь – ЗША» ў Вашынгтоне – і я ўпэўнена, што кансультацыі і падтрымка нашых заходніх партнёраў дапамогуць хутчэй дасягнуць гэтай мэты.
Дарагія беларусы, кожны з нас здольны перашкодзіць паглынанню Расіяй нашай радзімы. Дастаткова штодзень рабіць выбар на карысць беларускай мовы, нашых незалежных медыя, айчыннага бізнесу ды ініцыятываў. Памятайце: толькі ад нас залежыць будучыня краіны».
