Святлана Ціханоўская прыбыла ў Кембрыдж па запрашэнні Cambridge Union, найстарэйшай дыскусійнай супольнасці ў свеце. У Cambridge Union раней выступалі Уінстан Чэрчыль, Маргарэт Тэтчэр, давалі лекцыі прэзідэнты ЗША Тэадор Рузвельт, Рональд Рэйган, а таксама лідар Тыбета Далай Лама. Гэты выступ мае знакавае сімвалічнае значэнне, гэта знак прызнання і павагі беларускаму народу.
У сваім выступе Ціханоўская звярнулася да студэнтаў Кембрыджскага ўніверсітэта і расказала ім пра сітуацыю ў Беларусі і рэпрэсіі, узгадала апошнія прысуды і таксама прапанавала адказаць на пытанні, з якімі сутыкаецца часам сама. Гэта звязана, напрыклад, з такімі тэмамі як:
- ці паслабленне санкцыяў дапаможа вызваліць палітвязняў,
- ці ўспрымаць Лукашэнку як удзельніка вайны гэтаксама як і Пуціна,
- як украінцам успрымаць беларусаў, як агрэсараў ці як паплечнікаў у барацьбе,
- гвалтоўны ці негвалтоўны супраціў,
- што рабіць з людзьмі, якія зараз падтрымліваюць Лукашэнку і працуюць на рэжым?
Святлана Ціханоўская сказала, што ў яе ёсць адказы на гэтыя пытанні, але кожнае з іх вельмі складанае, мае і плюсы, і мінусы, і прадставіла таксама сваю пазіцыю.
Пасля адбылася дыскусія з удзелам студэнтаў і чальцоў Кембрыджскага саюза, дзе яны падзяліліся сваімі думкамі наконт развіцця сітуацыі ў Беларусі, як дапамагчы беларускім палітвязням, а таксама як захаваць беларускую незалежнасць.
Выступ Святланы Ціханоўская на ангельскай мове – па спасылцы.
