У Вільнюсе адбыўся другі раунд Стратэгічнага дыялогу з урадам Злучаных Штатаў Амерыкі. Сустрэчу ўзначалілі намеснік памочніка дзяржсакратара ЗША Крыстафер Сміт і лідарка Аб’яднанага пераходнага кабінета Святлана Ціханоўская. У дыялогу прынялі ўдзел прадстаўнікі дэмакратычных інстытутаў Беларусі, грамадзянскай супольнасці, праваабарончых арганізацыяў і медыя.
Асноўныя тэмы і дамоўленасці:
- Палітычныя зняволеныя:
ЗША падкрэслілі неабходнасць безумоўнага вызвалення палітычных зняволеных. Былі абмеркаваныя пашырэнне дапамогі іх сем’ям, праграмы рэабілітацыі і псіхалагічная падтрымка для вызваленых.
- Грамадзянская супольнасць і медыя:
Працягнецца фінансавая падтрымка незалежных медыя і праваабаронцаў у выгнанні. Асаблівая ўвага будзе нададзеная беларускаму бізнесу, які дзейнічае за межамі краіны.
- Расследаванні злачынстваў рэжыму:
ЗША падтрымліваюць міжнародныя расследаванні, якія ўключаюць збор сведчанняў і падрыхтоўку справаў для судоў па злачынствах супраць чалавечнасці.
- Нацыянальная ідэнтычнасць:
Падтрымка беларускіх культурніцкіх ініцыятываў будзе ажыццяўляцца праз праграмы захавання мовы, перакладу літаратуры, культурніцкіх мерапрыемстваў і адукацыйных ініцыятываў.
- Праграмы абменаў:
За мінулы год больш за 100 беларусаў прынялі ўдзел у адукацыйных і прафесійных абменах з ЗША. Плануецца павелічэнне колькасці ўдзельнікаў у 2025 годзе, асабліва сярод маладых лідараў, педагогаў і прадстаўнікоў медыя.
- Санкцыі:
Працягнецца ўмацаванне існуючых санкцыяў. Новыя меры будуць скіраваныя на асобы і кампаніі, якія падтрымліваюць рэжым і ўдзельнічаюць у вайне супраць Украіны, уключаючы пастаўкі для расійскай абароннай прамысловасці.
- Выбары 2025 года:
Абмеркаваная немагчымасць правядзення свабодных выбараў у цяперашніх умовах. «Выбары», якія адбудуцца ў студзені 2025 года, не могуць быць прызнаныя справядлівымі.
Сустрэча падкрэсліла важнасць далейшага ўмацавання партнёрства паміж ЗША і беларускімі дэмакратычнымі сіламі. Наступным крокам стане стварэнне рабочых групаў для рэалізацыі прынятых дамоўленасцяў.
