Падчас Мюнхенскай канферэнцыі па бяспецы беларуская лідарка правяла перамовы з Мерэдыт Уітакер, прэзідэнткай фонду Signal, якому належыць папулярны мэсэнджэр.
Ціханоўская распавяла пра пагрозы, з якімі сутыкаюцца беларусы ўнутры краіны, і падкрэсліла важнасць Signal для бяспечнай камунікацыі. Таксама лідарка перадала Мерэдыт Уітакер прапановы ад беларускіх актывістаў і праваабаронцаў па паляпшэнні бяспекі мэсэнджэра і зручнасці карыстання для беларусаў. Акрамя таго, бакі абмеркавалі беларускамоўную лакалізацыю мэсэнджэра. Прэзідэнтка Signal паабяцала вызначыць кантактную асобу, якая будзе працаваць з запытамі беларусаў.
На палях форуму Святлана Ціханоўская правяла сустрэчу з Аннай Маканджу, віцэ-прэзідэнткай OpenAI, які з’яўляецца распрацоўшчыкам ChatGPT.
Маканджу і Ціханоўская гаварылі пра магчымасць бясплатнага ці ільготнага доступу да ChatGPT 4.0 для беларускіх НДА і медыя, а таксама пра арганізацыю курсаў па выяўленні дэзынфармацыі з дапамогай ChatGPT для журналістаў і актывістаў. Асобна бакі абмеркавалі планы па паляпшэнні беларускамоўнай мадэлі ChatGPT.
Пры Офісе Святланы Ціханоўскай працуе ўпаўнаважаны па сувязях з тэхкампаніямі. Дасылайце вашыя прапановы і ідэі на tech@tsikhanouskaya.org.
